- वि.सं २o८१ जेठ ४ शुक्रबार
एमाले प्रवेश गरेका पूर्वमाओवादी नेताहरूले माओवादी केन्द्रको दल दर्ता खारेज गर्न निर्वाचन आयोगमा दर्ता गराएको निवेदन खारेज भएको छ । माओवादी केन्द्रको महाधिवेशन ०६९ पछि हुन नसकेको र यसैका कारण पार्टी अवैधानिक भएको भन्दै दल दर्ता खारेज गर्न दिएको निवेदन आयोगको बैठकले खारेज गरेको हो ।
पूर्वमाओवादी केन्द्रका नेताहरू लिलबहादुर थापा, रामचन्द्र मण्डल र अधिवक्ता सरोज बुढाथोकी गत बुधबार निर्वाचन आयोग निवेदन दिएका थिए ।
निवेदनअनुसार दाबी नपुगेकाले निवेदन खारेज भएको आयोगका प्रवक्ता राजकुमार श्रेष्ठले बताए । पूर्वमाओवादी केन्द्रका नेताहरू निवेदनाबारे बुझ्न पटकपटक निर्वाचन आयोग गएका थिए ।
सर्वोच्च अदालतले नेपाल कम्युनिस्ट पार्टी (नेकपा)को एकीकरणलाई खारेज गरिदिएपछि एमालेतर्फ लागेका पूर्वमाओवादी केन्द्रका नेताहरू रामबहादुर थापा, टोपबहादुर रायमाझी, लेखराज भट्ट, प्रभु साह, मणि थापालगायतलाई माओवादी केन्द्रले कारबाही गरेको थियो । कारबाही अवैधानिक भएको र माओवादी केन्द्रलाई निर्वाचित जनप्रतिनिधिलाई कारबाही गर्ने अधिकार पनि नभएको उनीहरूको दाबी थियो ।
