- वि.सं २o८१ बैशाख ३१ सोमबार
एमालेको दशौँ महाधिवेशन आयोजक कमिटी भंग भएलगत्तै संस्थापन पक्ष र वरिष्ठ नेता माधवकुमार नेपाल पक्षका दोस्रो तहका नेताहरूले ललितपुरको कुपण्डोलस्थित समिट होटेलमा सहमति खोज्ने ‘निर्णायक कसरत’ गरिरहेका छन् ।
दुवैतर्फबाट आठ नेता सहभागी बैठकमा उपप्रधानमन्त्री विष्णु पौडेलले सहमतिका लागि प्रस्तुत गरेको तीनबुँदे मस्यौदालाई अन्तिम रूप दिने गरी सहमति खोज्ने प्रयास चलिरहेको एक नेताले बताए ।
पार्टीका सबै सांगठनिक संरचनालाई २ जेठ ०७५ अघिको संरचनामा फर्काएर एकताबद्ध रूपमा अगाडि बढाउने, सर्वाेच्च अदालतमा कांग्रेस सभापति शेरबहादुर देउवालाई प्रधानमन्त्रीमा नियुक्तिका लागि परमादेश माग गर्दै दायर भएको रिटमा पार्टीका केही सांसदका तर्फबाट भएको हस्ताक्षर र प्रतिनिधिसभा विघटन दुवै अन्तर्विरोधको परिणाम भएकाले अदालतबाट आउने जुनसुकै फैसलालाई मानेर अगाडि बढ्ने, पार्टी अध्यक्ष केपी ओली नेतृत्वको वर्तमान सरकारलाई नै अगाडि बढाउने विषयलाई मस्यौदामा समेटिएको स्रोतले जनाएको छ । ‘तीनै विषयलाई काँटछाँट गरेर नेतृत्वसँगसमेत परामर्श लिएर अन्तिम रूप दिने प्रयास चलिरहेकाले छलफल निर्णायक हुन पनि सक्छ,’ स्रोतले भन्यो ।
छलफलमा संस्थापन पक्षबाट उपप्रधानमन्त्री पौडेल, सुपास नेम्वाङ, शंकर पोखरेल र विष्णु रिमाल तथा वरिष्ठ नेता माधवकुमार नेपालका तर्फबाट सुरेन्द्र पाण्डे, घनश्याम भुसाल, गोकर्ण विष्ट र भीम आचार्य सहभागी छन् ।
