मुख्य समाचार प्रिन्ट संस्करण

शव दहन गर्ने पशुपति विकास कोषका  कर्मचारीलाई एक हजार भत्ता, नेपाली सेनाबाट खटिएकाले पाउँदैनन् प्रोत्साहन भत्ता

पशुपतिस्थित भस्मेश्वर घाटमा जोखिम मोलेर कोभिडबाट मृत्यु भएकाको शव दहनमा संलग्न दहनकर्ताबीच प्रोत्साहन भत्तामै उपेक्षा गरिएको छ । पशुपति क्षेत्र विकास कोषका अनुसार कोभिडबाट मृत्यु भएकामध्ये झन्डै ६० प्रतिशत शव भस्मेश्वर घाटमा दहन हुँदै आएका छन् । जसमा सेनाका ४० सुरक्षाकर्मी र पशुपति क्षेत्र विकास कोषबाट खटिएका ३५ गरी ७५ जना छन् । जसमध्ये विकास कोषबाट खटिएका दहनकर्ताले जोखिम मोलेबापत प्रतिशव एक हजार रूपैयाँ प्रोत्साहन भत्ता पाउँछन् । तर, सेनाबाट खटिएका सुरक्षाकर्मी कसैले पनि प्रोत्साहन भत्ता पाउँदैनन् ।

सहायक रथी सन्तोषबल्लभ पौडेल, प्रवक्ता नेपाली सेना

सरकारले शव दहन गर्ने जिम्मा हामीलाई दिएको छ । त्यसैले नेपाली सेना यसलाई आफ्नो कर्तव्य सम्झी खटिँदै आएको छ । यसबापत सेनाले कुनै प्रोत्साहन भत्ता पाउँदैन । ‘सरकारले अतिरिक्त सुरक्षा भत्ता दिने भनेको हो । तर, अहिलेसम्म कसैले पाउन सकेका छैनन् ।

कोषबाट खटिएका दहनकर्तालाई संस्कृति, नागरिक उड्डयन तथा पर्यटन मन्त्रालयले नै जोखिम मोलेबापत प्रोत्साहन भत्ता दिने निर्णय भएको हो । तर, सेनाबाट खटिएका सुरक्षाकर्मीका लागि भने त्यस्तो व्यवस्था नभएको विकास कोषका सदस्यसचिव डा.प्रदीप ढकालले बताए । ‘भस्मेश्वर घाटमा अहिले कोभिडबाट मृत्यु हुने सरदर सयको हाराहारीमा शव दहन हुँदै आएका छन् । जसका लागि सेनाबाट ४० र कोषबाट ३५ जना खटिएका छन् । कोषबाट खटिएकालाई प्रतिशव एक हजार रुपैयाँ भत्ता दिने भनिएको छ । सेनाको हकमा उत्तैबाट केही व्यवस्था होला कि,’ उनले भने ।

कोभिडबाट मृत्यु हुनेको शव दहन गर्ने मुख्य जिम्मा सेनाले लिएको छ । त्यसो हुँदा मुलुकभर मृत्यु भएका संक्रमितको शव सेनाले नै दहन गर्दै आएको छ । यसका लागि दैनिक सयदेखि एक सय ५० जना सुरक्षाकर्मी खटिँदै आएका छन् । यसरी खटिने सुरक्षाकर्मीलाई प्रोत्साहन भत्ता दिने निर्णय नभएको सैनिक जनसम्पर्क निर्देशनालयले जानकारी दिएको छ ।

सैनिक प्रवक्ता सहायक रथी सन्तोषबल्लभ पौडेलले प्रोत्साहन भत्ताभन्दा पनि सेनाले आफ्नो दायित्व पूरा गरिरहेको बताए । ‘सरकारले शव दहन गर्ने जिम्मा हामीलाई दिएको छ । त्यसैले सेना यसलाई आफ्नो कर्तव्य सम्झी खटिँदै आएको छ । यसबापत सेनाले कुनै प्रोत्साहन भत्ता पाउँदैन,’ उनले भने ।

घोषित अतिरिक्त भत्तासमेत कसैले पाएनन् 
कोभिडको महामारीका क्रममा अग्रपंक्तिमा खटिएकालाई सरकारले अतिरिक्त भत्ता दिने निर्णय गरेको थियो । विशेष गरी सेना, नेपाल प्रहरी, सशस्त्र प्रहरी र स्वास्थ्यकर्मीलाई सरकारले यस पंक्तिमा राखेको थियो । तर, घोषणा भएको वर्षदिन बितिसक्दा पनि कसैले अतिरिक्त भत्ता पाउन सकेका छैनन् ।

कोभिड संक्रमणकै कारण सेनाका दुई, नेपाल प्रहरीका सात र सशस्त्र प्रहरीका दुई गरी ११ सुरक्षाकर्मीले ज्यान गुमाइसकेका छन् । तीनवटै सुरक्षा निकाय गरी १३ हजार चार सय ४२ संक्रमित भएका छन् । यो दर अझ बढ्दो छ । त्यस्तै, अग्रपंक्तिमा खटिने स्वास्थ्यकर्मी पनि कोभिडबाट मृत्यु भएका छन् । संक्रमित हुने दर पनि उत्तिकै छ । तर, घोषणा भएको अतिरिक्त भत्ता भने कसैले पाउन सकेका छैनन् । ‘सरकारले अतिरिक्त सुरक्षा भत्ता दिने भनेको हो । तर, अहिलेसम्म कसैले पाउन सकेका छैनन् । यसैका आधारमा ड्युटी नै प्रभावित हुने भन्ने होइन,’ सैनिक प्रवक्ता पौडेलले भने ।

रक्षा मन्त्रालयका प्रवक्ता कृष्ण ज्ञवालीले अग्रपंक्तिमा खटिनेलाई दिने भनिएको अतिरिक्त भत्ताबारे नयाँ केही नभएको बताए । ‘सरकारले अग्रपंक्तिमा खटिनेहरूलाई भत्ता दिने भनेको हो । तर, यसबारेमा नयाँ केही डेभलपमेन्ट भएजस्तो लाग्दैन । पहिला जे निर्णय भएको हो, विषयवस्तु त्यही नै हुन्,’ उनले भने ।