१७औँ वार्षिकोत्सव विशेषांकफ्रन्ट पेजमुख्य समाचारसमाचारदृष्टिकोणअर्थअन्तर्वार्ताखेलकुदविश्वफिचरप्रदेशपालिका अपडेट
  • वि.सं २०८१ बैशाख १३ बिहीबार
  • Thursday, 25 April, 2024
२०७७ माघ २७ मंगलबार १३:५९:००
Read Time : > 3 मिनेट
खेलकुद

नवौँ राष्ट्रिय खेलकुद प्रतियोगिता : गण्डकी प्रदेशमा पूर्वाधार निर्माण र प्रशिक्षणले गति लियो 

Read Time : > 3 मिनेट
२०७७ माघ २७ मंगलबार १३:५९:००

कोरोनाको कहर नहुँदो हो त यति वेला गण्डकी प्रदेशमा राष्ट्रिय खेलकुदको भव्य तयारी भइरहेको हुन्थ्यो । खेल र खेलाडीको महाकुम्भ मेला राष्ट्रिय खेलकुदको चर्चा देशभरि चुलिन्थ्यो । तर, कोरोनाले गर्दा खेलकुद क्षेत्र लामो समय ठप्प रहेपछि प्रतियोगिताको तयारी हुन पाएन र यस वर्ष फागुन अन्तिम साता तय गरिएको राष्ट्रिय खेलकुद प्रभावित बन्यो । 

वैशाख ०७६ मा लुम्बिनी प्रदेशमा भएको आठौँ राष्ट्रिय प्रतियोगिताको समापन समारोहमा गण्डकीको टोलीले फागुन ०७७ मा नवौँ संस्करण गर्ने जिम्मेवारीसहित झन्डा बोकेर आए पनि कोरोनाकै कारण निर्धारित मितिमा राष्ट्रिय खेलकुद नहुने निश्चित भएको छ । कोरोनाको असर हरेक दुई-दुई वर्षमा आयोजना हुने प्रतियोगितामा परेकोे छ ।

राष्ट्रिय खेलकुद पूर्वनिर्धारित मितिमा सञ्चालन हुन सक्ने अवस्था नरहेपछि नेपाली खेलकुदको सर्वोच्च संस्था राष्ट्रिय खेलकुद परिषद् (राखेप)ले २०७८ सालमा राष्ट्रिय खेलकुद सञ्चालन गर्ने योजना बनाएको छ ।

प्रतियोगिताको मिति अहिलेसम्म नतोकिए पनि अर्को वर्ष प्रतियोगिता हुने निश्चित भएकाले ‘होस्ट’ प्रदेश गण्डकीले कोरोनाको प्रभाव र त्रास कम हुँदै गएपछि तयारी सुरु गरिसकेको छ । अहिलेदेखि नै प्रतियोगिता तयारी सुरु गरेर यहाँ हुने राष्ट्रिय खेलकुद भव्य बनाउने लक्ष्य गण्डकी प्रदेशको छ । पछिल्लो समय कोरोना संक्रमणको प्रभाव कम भएसँगै पोखरासहित देशभर खेलकुद गतिविधि चलायमान हुन थालेका छन् । खेलाडी प्रशिक्षण, पूर्वाधार निर्माण तथा खेलकुदका केही प्रतियोगिता भइरहेकाले खेलकुद माहोल सुरु भएको छ । राजधानी बाहिरसमेत फुटबल, भलिबल खेलका प्रतियोगिताका मिति तय गरिएका छन् । 

खेल पूर्वाधार निर्माण, स्तरोन्नतिसहित खेलसँग आबद्ध संघहरूले प्रतियोगिता आयोजना, खेलाडी छनोट र प्रशिक्षण थालेसँगै राष्ट्रिय खेलकुदको तयारी सुरु भएको छ । पश्चिमाञ्चल क्षेत्रीय खेलकुद विकास समितिका कार्यालय प्रमुख लक्ष्मणनाथ योगीले कोरोनाको त्रास कम हुँदै गएको र खेलकुदको चहलपहल बढ्न सुरु भएसँगैै राष्ट्रिय खेलकुदका लागि तयारी सुरु गरिएको बताए । 

प्रतियोगिता तयारीका लागि हाल निर्माणाधीन खेल पूर्वाधार सम्पन्न गर्ने, आवश्यक नयाँ पूर्वाधार तयार गर्ने, भइरहेकाको स्तरोन्नति तथा प्रतियोगिताका लागि क्षमतावान खेलाडीको खोजी, नयाँ खेलाडी उत्पादन र उनीहरूलाई प्रशिक्षण दिने गरी योजना निर्माण गरिएको उनले बताए । 

आयोजक प्रदेश भएकाले समेत प्रतियोगिताका लागि क्षमतावान खेलाडी तयारी गरी राम्रो नतिजा ल्याउनुपर्ने दबाब गण्डकीलाई छ । प्रतियोगिताको अबको पहिलो प्राथमिकता राम्रा खेलाडी उत्पादन र उनीहरूलाई प्रतियोगिताका लागि तयार बनाउनु छ । ‘पूर्वाधारका कारणले रोकिने अवस्था नभए पनि खेलकुद गतिविधि लामो समय ठप्प रहेकाले फागुनमा आयोजना हुने अवस्था रहेन,’ कार्यालय प्रमुख योगीले भने, ‘आगामी वर्ष राष्ट्रिय खेलकुद हुने निश्चित रहेकाले प्रतियोगितालाई भव्य बनाउन पूर्वाधार, खेलाडी प्रशिक्षणलगायत पूर्वतयारीका काम अहिलेबाट नै सुरु गरेका छौँ ।’

प्रतियोगितामा ३५ खेल
राष्ट्रिय खेलकुदमा ३५ खेल विधा समावेश हुनेछन् । प्रदेशका ११ वटै जिल्लामा कम्तीमा एक खेल सञ्चालन गर्ने तयारी आयोजकको छ । फुटबल, क्रिकेट, भलिबल, ह्यान्डबललगायत मुख्य मुख्य खेलसहित अधिकांश खेल प्रदेशको राजधानी सहर पोखरामा सञ्चालन हुनेछन् । खेल पूर्वाधारका हिसाबले गण्डकी अब्बल प्रदेश छ । यसअघिका संस्करणमा जस्तो रातारात पूर्वाधार बनाएर प्रतियोगिता सञ्चालन गर्नुपर्ने बाध्यता यहाँ छैन, तर एक–दुई खेलका पूर्वाधारका बारेमा भने अझै अन्योल छ ।

राष्ट्रिय खेलकुदको मुख्य आयोजनास्थल पोखरा रंगशालाभित्र ‘इन्डोर’ र ‘आउटडोर’ खेलका पूर्वाधार तयारी छन् । फुटबलको अन्तर्राष्ट्रिस्तरको रंगशाला, सुविधासम्पन्न बहुउद्देश्यीय कभर्डहल, ब्याडमिन्टन कोर्ट, भलिबल कोर्ट, टेनिस कोर्ट, क्रिकेट मैदानलगायत अधिकांश खेलका पूर्वाधार तयारी अवस्थामा छन् भने केहीको मर्मत र सुधार गर्नुपर्ने अवस्था छ ।

नवौँको लागि रंगशालाभित्र ‘सुटिङ रेन्ज’, पौडी पोखरी, हक्कीबाहेकका अन्य पूर्वाधार तयार छन्, केहीको स्तरोन्नति आवश्यक छ । बन्न बाँकी खेलका पूर्वाधार निर्माण गर्ने योजना रहे पनि हालसम्म काम अघि बढेको छैन । प्रदेशका सबै जिल्लामा कम्तीमा एक खेल खेलाउने योजनापछि जिल्लामा रहेका खेल पूर्वाधारको अवस्थाबारे केही दिनमा अनुगमनमा जाने तयारीमा रहेको पश्चिमाञ्चल क्षेत्रीय खेलकुदका कार्यालय प्रमुख योगीले बताए । उलले भले, ‘राष्ट्रिय खेलकुदका लागि पूर्वाधार नभएको सुटिङ र स्विमिङ मात्र हो, अन्यको पूर्वाधारको समस्या छैन, केहीको सुधार गर्नुपर्नेछ, सबै जिल्लामा खेल सञ्चालन गर्ने भएपछि जिल्लामा रहेका संरचना खेलका लागि उपयुक्त छ–छैन भनेर अनुगमनमा जाने तयारी गरेका छौँ, पोखराबाहिर पनि कुनै जिल्लामा तीन–चारवटा खेल सञ्चालन गर्ने योजना छ ।’

हरेक जिल्लामा खेल पूर्वाधार निर्माण तथा स्तरोन्नति सुरु
राखेपबाट चालू आर्थिक वर्षमा विनियोजित बजेटबाट जिल्लाहरूमा खेल पूर्वाधार निर्माण तथा स्तरोन्नति सुरु भएकामा त्यसबाट अपुग हुने भएकाले प्रतियोगिताका लागि ४६ करोड बजेट माग गरिएको प्रमुख योगीले जानकारी दिए । प्रतियोगिता आयोजनाको खर्च राखेपको भए पनि निर्माणाधीन पूर्वाधार सम्पन्न गर्न राखेपसँग ४१ करोड तथा गण्डकी प्रदेश सरकारसँग प्रदेशको टोली तयार र खेल प्रशिक्षकका लागि पाँच करोड बजेट माग गरिएको जनाइएको छ । भलिबल, एथलेटिक्स, कराँते, शारीरिक सुगठन, तेक्वान्दो, उसु गरी नौ खेलका प्रशिक्षक रहे पनि बाँकी १६ वटा खेलका लागि प्रशिक्षक तत्काल आवश्यक रहेको समितिले जनाएको छ । 

राष्ट्रिय खेलकुद् परिषद्का सदस्य सम्पन्न श्रेष्ठले कोरोनाका कारण यस वर्ष राष्ट्रिय खेलकुदमा असर परे पनि आगामी वर्ष हुने निश्चित रहेकाले पूर्वाधार नभएका खेलका समेत पूर्वाधार निर्माण तयारी गरिएको बताए । उनले भने, ‘पूर्वाधार नभएका खेलका पूर्वाधारसमेत यस अवधिमा निर्माण गरेर प्रतियोगिता ऐतिहासिक बनाउन राखेप प्रतिबद्ध छ । त्यसका लागि हामीले तयारी सुरु गरिसकेका छौँ ।’

राष्ट्रिय खेलकुदलाई लक्ष्य गरी खेलाडी तयार गर्न खेल संघ तथा विभिन्न क्लबले पनि अग्रसरता देखाएका छन् । जिल्ला भलिबल संघले आसन्न राष्ट्रिय खेलकुदलाई लक्ष्य गरी अन्तर ‘मुख्यमन्त्री कप अन्तरजिल्ला भलिबल’ प्रतियोगिताको तयारी गरेको छ भने टाइगर ग्रुपले २७ माघदेखि राष्ट्रिय महिला तथा पुरुष भलिबल प्रतियोगिता गर्दै छ । यही ४ देखि ८ फागुनसम्म पोखरा रंगशालाभित्रको भलिबल कोर्टमा आयोजना हुने मुख्यमन्त्री कप प्रतियोगितामा प्रदेशका ११ वटै जिल्लाबाट प्रतिनिधित्व हुनेछ । 

संघ अध्यक्ष भीमप्रसाद पराजुलीले मुख्यमन्त्री कप भलिबलले राष्ट्रिय प्रतियोगिताका लागि खेलाडी छनोटमा मद्दत पुग्ने र खेलाडीलाई मानसिक रूपमा तयार पार्ने बताएका  छन् । उनले भने, ‘गण्डकी प्रदेशमा तय भएको नवौँ राष्ट्रिय खेलकुद प्रतियोगितालाई लक्ष्य गरी गाउँगाउँमा लुकेका प्रतिभा प्रस्फुटन गरी प्रतिभावान भलिबल खेलाडी उत्पादन गर्न प्रतियोगिता गर्न लागेका हौँ ।’

खेलाडीहरूलाई खेल सामग्री, आवश्यक ‘डाइट’, आधारभूत स्वास्थ्य सुविधाको प्रबन्ध नभएकाले आधारभूत आवश्यकता पूरा गरी राष्ट्रिय प्रतियोगिता खेल्ने वातावरण तयार गर्न राखेप तथा खेलकुदमा काम गर्ने संस्थाहरूले ध्यान दिनुपर्ने पराजुलीको भनाइ छ ।