सिँचाइ गर्न बनाइएकाे प्लाष्टिकको कृत्रिम पोखरीमा डुबेर तीन बालिकाको मृत्यु
तेह्रथुमको छथर गाउँपालिका– ६ सुदाप च्याङलुङ गाउँमा कृत्रिम पोखरीमा डुबेर तीनजना बालिकाको मृत्यु भएको छ ।
स्थानीयले तरकारीमा सिँचाइ गर्न प्लाष्टिक लगाएर बनाएको पोखरीमा जमेको पानीमा डुबेर शनिबार साँझ ६, ७ र ८ वर्षका तीनजना बालिकाको मृत्यु भएको हो ।
मृत्यु हुनेहरूमा ६ वर्षीया रोजिना, सात वर्षीया रञ्जना अनि आठ वर्षीया सुहाना लिम्बू छन् । रञ्जना र रोजिना दिदी–बहिनी हुन् ।
वडाध्यक्ष टेकराज लिम्बूका अनुसार दिउँसो घरबाट खेल्न निस्कएका बालबालिकाहरू घर नआएपछि खोजी गर्ने क्रममा तीनैजनाको शव प्लाष्टिकको पोखरीमा फेला परेको थियो ।
एउटै गाउँका तीनजना बालबालिकाहरूको आकस्मात् डुबेर मृत्यु भएपछि सुदाप गाउँ नै शोकमा डुबेको छ ।
आइतबार तीनैजना बालिकाकाे शव परीक्षणका लागि प्रहरीले सदरमुकाम म्याङलुङ लाने तयारी गरिरहेको छ ।
तरकारीमा सिँचाइ गर्न बनाइएको प्लाष्टिकको पोखरीमा करिब ६ फिट गहिरो पानी थियो ।
खेल्ने क्रममा दिउँसो गर्मी भएपछि बालिकाहरू लुगा खोलेर पौडी खेल्न पोखरीमा पसेको, तर चिप्लिएर निस्कन नसक्दा डुबेर मृत्यु भएको हुन सक्ने स्थानीयको आशंका छ ।
घटनास्थल कोसी राजमार्गस्थित सिँजुवा बजारदेखि करिब २० किलोमिटर टाढा पूर्व पर्दछ ।