कांग्रेस सांसद सूर्यबहादुर केसीको निधन भएपछि उनको ठाउँमा मोहनप्रसाद पाण्डे सांसद बन्ने भएका छन् । केसी प्रतिनिधि सभाको समानुपातिकतर्फ खस आर्य क्लस्टरबाट सांसद बनेका थिए । उनको ठाउँमा समानुपातिकतर्फबाट पाण्डे आउने भएका हुन् ।
निर्वाचनका वेला कांग्रेसले बुझाएको समानुपातिकतर्फको बन्दसूचीको आधारमा उनी आउने भएका हुन् । पाण्डे आउने सन्दर्भमा कांग्रेस केन्द्रीय कार्यालयका मुख्यसचिव कृष्ण पौडेल भन्छन्, ‘यो विषयमा हाम्रो केन्द्रीय समितिले निर्णय गर्ने हो । निर्वाचन आयोगले हामीलाई चिठी पठाउनुपर्छ । निर्वाचन आयोगको चिठी प्राप्त भएपछि केन्द्रीय समितिले निर्णय गर्छ ।’
पाण्डेलाई ल्याउने सन्दर्भमा संसद्ले निर्वाचन आयोगलाई केसीको मृत्युबारे जानकारी दिनेछ । र, आयोगले पार्टीलाई सांसद सिफारिस गर्न चिठी लेख्नेछ ।
पाण्डे २०६४ को संविधानसभा निर्वाचनमा स्याङ्जा– ३ बाट निर्वाचित भएका थिए ।
गत सोमबार पोखरामा सांसद केसीको निधन भएको थियो । उद्योगीसमेत रहेका केसी मधुमेह र उच्चरक्तचापको समस्याले लामो समयदेखि थलिएका थिए ।