बेग्लाबेग्लै सवारी दुर्घटनामा परी काठमाडौं उपत्यकामा दुईजनाको मृत्यु भएको छ ।
काठमाडौं महानगरपालिका– ३१ शान्तिनगरमा मोटरसाइकलले पैदल यात्रुलाई ठक्कर दिँदा एक पैदलयात्रीको मृत्यु भएको छ । मृत्यु हुनेमा गोलढुंगा बस्ने २० वर्षका सुजु पटुवार रहेको प्रहरीले जनाएको छ ।
बुधबार साँझ सडकमा पैदल यात्रा गरिरहेका पटुवारलाई मोटरसाइकलले ठक्कर दिएपछि उनी घाइते भएका थिए ।
उनलाई उपचारको क्रममा सिभिल अस्पताल पुऱ्याइएको र त्यहाँबाट ट्रमा सेन्टर लगिएकोमा उपचारको क्रममा मृत्यु भएको प्रहरीले जनाएको छ । दुर्घटनामा घाइते भएका मोटरसाइकलचालकको केएमसी अस्पतालमा उपचार भइरहेको प्रहरीले जनाएको छ।
त्यसैगरी नम्बर नखुलेको बोलेरो गाडीले ठक्कर दिँदा ललितपुर महानगरपालिका– ८ मा एक पैदल यात्रीको मृत्यु भएको छ ।
गाडीको ठक्करबाट इमाडोलका ७८ वर्षीय बाबुकाजी श्रेष्ठ घाइते भएको र उपचारका लागि बी एन्ड बी अस्पताल लैजाने क्रममा मृत्यु भएको प्रहरीले जनाएको छ ।
ठक्कर दिने सवारीसाधनको खोजी भइरहेको प्रहरीको भनाइ छ ।