प्रचण्डले गरे टंकमणिको सालिक अनावरण

माओवादीका अध्यक्ष पुष्पकमल दाहाल प्रचण्डले सहिद स्मृति प्रतिष्ठान नेपाल रुपन्देहीका संस्थापक अध्यक्ष रामप्रसाद बन्जाडे टंकमणिको सालिक अनावरण गरेका छन् । बुटवलमा आइतबार आयोजित कार्यक्रममा उनले ‘टंकमणिः एक क्रान्तिबीज’ पुस्तकसमेत विमोचन गरेका छन् । 

कार्यक्रमलाई सम्बोधन गर्दै प्रचण्डले क्रान्तिकारी योद्धाका रूपमा पञ्चायती व्यवस्थाविरुद्धदेखि अन्य परिवर्तनका आन्दोलनमा टंकमणिले असाधारण सक्रियता देखाएको स्मरण गरे । ‘टंकमणि जनयुद्ध कालमा पनि असाध्यै सक्रिय हुनुहुन्थ्यो, कहिलेकाहीँ उहाँको सक्रियता देख्दा यति धेरै सक्रिय किन हुन्छ? के हो ? भन्ने प्रश्न उठ्ने गर्थ्यो,’ प्रचण्डले भने, ‘तर समयक्रमसँगै पार्टी काम, व्यवहार र गतिविधिबाट टंकमणिले राम्रै जवाफ दिनुहुन्थ्यो।’  

क्रान्ति, पार्टी, राष्ट्र र जनताप्रति टंकमणि दृढतापूर्वक उभिने गरेको भन्दै प्रचण्डले टंकमणि जोखिमपूर्ण कामको जिम्मा लिएर पार्टी र जनयुद्धलाई योगदान पुर्‍याएको स्मरण पनि गरे। टंकमणिको सक्रियताको बारेमा कुरा राखेका प्रचण्डले आफ्नो राजनीतिक जीवनमा पनि बढी सक्रियता हुँदा प्रश्न उठेको सम्झिए। ‘म भर्खर पार्टीमा होलटाइमर भएर आएपछि असाधारण सक्रिय थिए, हुन त म अहिले पनि उत्तिकै सक्रिय छु,’ प्रचण्डले भने।

हाइस्कुलको जागिर छाडेर सेल कमिटीमा बस्न आएर किन यति धेरै असाधरण सक्रिय छ भनेर जिल्ला कमिटीमा आफ्नाबारेमा त्यति वेला चर्चा हुने गरेको उनले सम्झिए। 

प्रतिष्ठानका अध्यक्ष हरिप्रसाद घिमिरेले संस्थापक अध्यक्षको योगदानलाई स्मरण गर्ने गरी कार्यालयपरिसरमा टंकमणिको सालिक निर्माण गरिएको बताए।

कार्यक्रममा बुटवल उपमहानगरपालिका प्रमुख खेलराज पाण्डेयले टंकमणिसँग बिताएका क्षणहरूको स्मरण गरेका थिए । उनले उपमहानगर सबै पक्षलाई समेटेर अघि बढिरहेको दाबी पनि गरे ।

कार्यक्रममा पत्रकार तथा लेखक डिआर घिमिरेले टंकमणि एक क्रान्तिबीज पुस्तकका बारेमा चर्चा गरेका थिए । त्यस्तै डा. सुरेन्द्र गिरी, गोपी ज्ञवालीलगायतले पनि टंकमणिको योगदान तथा पुस्तकका बारेमा धारणा राखेका थिए । 

कार्यक्रममा माओवादीका उपमहासचिव वर्षमान पुन, पार्टी सचिव तथा लुम्बिनी प्रदेश इन्चार्ज चक्रपाणि खनाल, पूर्वसभामुख ओनसरी घर्ती, पूर्वमन्त्रीहरू रेखा शर्मा, लुम्बिनी प्रदेशका पूर्वमुख्यमन्त्रीहरू कुलप्रसाद केसी, जोखबहादुर महरालगायत नेता-कार्यकर्ताको सहभागिता रहेको थियो। स्व. टंकमणिको ८ मंसिर ०७८ मा सवारी दुर्घटनामा निधन भएको थियो।