- वि.सं Invalid date format
जनता समाजवादी पार्टी (जसपा)नेपालका अध्यक्ष उपेन्द्र यादवले भूमिसम्बन्धी विधेयकविरुद्धको आन्दोलन निष्कर्षमा नपुर्याएसम्म आन्दोलन जारी रहने बताएका छन्।
सुकुम्बासी व्यवस्थापनको नाममा भूमि विधेयक ल्याएर सरकारले मधेशलाई मरुभूमीकरण बनाउन खोजेको आरोप लगाए । चुरे विनासका कारण मधेशमा भूमिगत पनिको सतह समाप्त हुँदै गएको उल्लेख गर्दै अध्यक्ष यादवले भने, ‘भूमि विधेयकले थप चुरे विनास बढाउँछ र मधेश मरुभूमिमा परिणत हुने निश्चित छ।’
शनिबार जनकपुरधाममा मधेशी स्वास्थ्यकर्मी फोरम मधेश प्रदेशको दोस्रो अधिवेशनको उद्घाटन समारोहलाई सम्बोधन गर्दै अध्यक्ष यादवले मुलुकको विकासको लागि सरकार सुल्टो बाटो हिँड्नुपर्नेमा झन् उल्टो बाटोमा हिँड्न लागेको बताए।
‘बिचौलिया र भूमि माफियाको इसारामा भूमि विधेयक ल्याएको हो,’ अध्यक्ष यादवले भने, ‘यसले मधेशलाई मरुभूमीकरण मात्र नभई औपनिवेशीकरणमा समेत परिणत गराउनेछ, त्यसकारण सरकारको यो कदमविरुद्ध जसपा नेपालले सुरु गरेको आन्दोलनलाई निष्कर्षसम्म पुर्याएरै छोड्छ।’
प्रजातन्त्रको ३५ वर्षे अवधिमा मुलुक अघि बढ्नुपर्नेमा कांग्रेस र एमालेका कारण मुलुकलाई झन् अधोगति भोग्नुपरिरहेको उल्लेख गर्दे उनले भने, ‘यो अवधिमा मुलुकको उद्योगधन्दा समाप्त भएको छ । शिक्षाको गुणस्तर खस्किएको छ, मुलुक ऋणमा डुबेको छ । त्यति मात्र होइन, मुलुक अहिले ग्रे लिस्टमै परिसकेको छ ।’ मुलुकमा गरिबी भ्रष्टाचार र बेथिति अन्तिम विन्दुमा पुगेको भन्दै अध्यक्ष यादवले त्यो हटाउनका लागि पनि आफूहरू आन्दोलनमा होमिएको दाबी गरे ।
कार्यक्रममा जसपा नेपालका महासचिव एवं मधेश प्रदेशका प्रथम मुख्यमन्त्री लालबाबु राउतले मधेशको भावनाविपरीत ल्याइएको अपूर्ण संविधानलाई पूर्णता दिन जसपा नेपालको संघर्ष जारी रहने चेतावनी दिए।
वर्तमान सरकार संविधानको मर्मविरुद्ध भूमि विधेयक ल्याएको उनले दाबीसमेत गरे । यो विधेयकले मधेशमा मधेशीलाई अल्पमत पार्ने महेन्द्र पथलाई निरन्तरता दिएको हुँदा त्यसविरुद्ध संघर्ष आवश्यक रहेको उनको भनाइ थियो।
