नेपालले पाँच खेलमा व्यहोर्‍यो २० गोल

• भुटानमा चलिरहेको साफ यू–१७ महिला च्याम्पियनसिपमा नेपालले पाँच खेल खेल्दा विपक्षी पोस्टमा तीन गोल मात्र फर्कायो, डबल राउन्डअनुसार भइरहेको प्रतिस्पर्धामा नेपाल दुई खेलअगाडि नै उपाधि होडबाट बाहिरिएको थियो 

नेपाली यू–१७ महिला टोलीले भुटानको थिम्पुमा चलिरहेको साफ महिला च्याम्पियनसिपमा प्रतिस्पर्धा गरिरहेको छ । डबल राउन्ड रोबिन लिगअनुसार चलिरहेको प्रतिस्पर्धामा नेपालले अहिलेसम्म एक जित र चार हारको सामना गरेको छ । प्रशिक्षक चेतन घिमिरेको प्रशिक्षणमा रहेको नेपालले च्याम्पियनसिपमा उत्कृष्ट प्रदर्शन गर्न सकिरहेको छैन । लगातार नेपालले खराब हारसँगै फराकिलो गोलअन्तरसमेत व्यहोरेको छ । नेपालले समग्रमा पाँच खेलमा २० गोल खाएको छ । नेपालले तीन गोल मात्रै विपक्षी पोस्टमा फर्काएको छ । 

प्रशिक्षक घिमिरेले प्रतियोगिता जित्ने लक्ष्यका साथ तयार भएको बताएका थिए । तर, थिम्पुमा नेपाली युवा महिला खेलाडीले मैदानमा प्रतिस्पर्धा गर्दा च्याम्पियनशैलीको प्रदर्शन छनक देखाउन सकेको छैन । डिफेन्स, मिडफिल्ड र फिनिसिङमा नेपाल लगातार चुकिरहेको छ । पहिलो चरणमा नेपालले एक मात्र जित भुटानविरुद्ध निकालेको थियो । अझ नेपालले भुटानलाई हराउन धेरै मिहिनेत गर्नुपरेको थियो । 

प्रतियोगिताअन्तर्गत शुक्रबार नेपालले भारतविरुद्ध प्रतिस्पर्धा गरेको थियो । सबै पक्षमा कमजोर प्रदर्शन हुँदा नेपाल भारतसँग ७–० ले पराजित भयो । उपाधि दाबेदार भारतको जितमा पर्ल फर्नान्डेसले ह्याट्रिक गरेकी थिइन् । दिव्यानी लिन्डाले नेपालको पोस्टमा दुई गोल गरिन् । पाँच खेलमा एक जित र तीन हारसहित नेपालको तीन अंक छ । प्रतियोगिताबाट बाहिरिसकेको नेपालले अब आइतबार अन्तिम खेल भुटानविरुद्ध खेल्नेछ । 

डबल राउन्ड रोबिन लिगमा भइरहेको प्रतियोगितामा भारत पाँच खेलमा १५ अंकका साथ शीर्ष स्थानमा छ । भारतलाई पछ्याइरहेको बंगलादेशले पाँच खेलमा १० अंक जोडेर दोस्रो रक्षा गरेको छ । जितविहीन भुटान १ अंकसहित चौथोमा छ । नेपाल, भारत, बंगलादेश र आयोजक भुटान गरी चार टोली मात्र सहभागी रहेको प्रतियोगितामा सबैभन्दा बढी अंक जोड्ने टोलीले उपाधि जित्ने प्रावधान छ ।

विपक्षीको गोलपोस्टमा नेपालको जम्मा तीन गोल 
प्रतियोगितामा नेपालको फिनिसिङ निकै कमजोर देखिएको छ । पाँच खेल सकिँदा नेपालले केवल तीन गोल मात्र गर्‍यो । नेपालले तीनमध्ये दुई गोल सहभागी टोलीमध्ये कमजोर प्रतिद्वन्द्वी भुटानविरुद्ध रह्यो । भुटानलाई नेपालले २–१ ले हराउँदा सहारा लिम्बूले दुई गोल गरेकी थिइन् । बंगलादेशलाई ४–१ को नतिजा सुम्पिएको खेलमा नेपालका लागि एक मात्र गोल भूमिका बुढाथोकीले गरेकी थिइन् । बंगलादेश र भारतका खेलाडीले नेपालविरुद्ध समान एक ह्याट्रिक लगाएका छन् । समग्रमा अहिलेसम्म साफ यू–१७ महिला च्याम्पियनसिपमा १० खेल सकिँदा ४४ गोल भएको छ । तथ्यांकअनुसार प्रतिखेल ४.४ गोल औसत रहेको छ । भारतकी अनुष्का कुमारीले सर्वाधिक सात गोल गरेकी थिइन् । सर्वाधिक पाँच, चार र तीन गोलमा भारतीय खेलाडीकै दबदबा छ ।