लालु यादव मृत्युको घटनाबारे संसदमा उठ्यो आवाज

सप्तरीको राजगढ गाउँपालिका– २ मा प्रहरीले चलाएको गोली लागेर स्थानीय विद्यालय व्यवस्थापन समितिका अध्यक्ष लालु यादवको मृत्युको विषयले संसदमा पनि प्रवेश पाएको छ ।

शुक्रबार प्रतिनिधिसभा बैठकमा बोल्दै नेपाली कांग्रेसका सांसद दिनेशकुमार यादवले घटनाको छानबिन गर्न उच्चस्तरीय समिति गठन गर्न माग गरेका छन् । ‘हामीले यत्रो बहुदल ल्यायाैँ, संविधान ल्यायाैँ, मौलिक अधिकार दियौँ, तर सिधै गोली हान्ने अधिकार त छैन नि,’ उनले भने, ‘त्यहाँको परिस्थिति त्यहाँको भिजुअल भिडियोहरू हेर्दाखेरि त्यो इन्स्पेक्टरलाई एउटा प्रहरीले यही हो लालु यादव भनेर चिनाएपछि इन्स्पेक्टरले  तीनवटा गोली हानेर हत्या गरिएको छ। यस्तो जघन्य अपराधको छानबिन उच्चस्तरीयबाट होस्, कारबाही होस् भनी हामी सम्पूर्ण सप्तरीवासीले यो माग उठाएका हो । सभामुखमार्फत नेपाल सरकारकाे ध्यानाकर्षण गराउन चाहन्छु।’ सप्तरीको राजगढ गाउँपालिका– २ मा प्रहरीले चलाएको गोली लागेर लालु यादवको मृत्यु भएकाे थियो । लालु यादव, स्थानीय विद्यालय व्यवस्थापन समितिका अध्यक्षसमेत हुन्।

साउन २० गते राति भारततर्फ मदिरा तस्करी भइरहेको सूचनाको आधारमा पुगेको प्रहरी टोलीले गोली चलाउँदा उनको मृत्यु भएको थियो।