पूर्वप्रहरी नायब महानिरीक्षक रमेश खरेललाई ३ प्रश्न

एकै प्रकृतिका मुद्दामा पनि कसैलाई हिरासत त कसैमाथि अनुसन्धान नै नहुने अवस्था किन आउँछ ?
यो देशमा सबैका लागि कानुन बराबर छैन । शक्तिमा हुने मान्छेका लागि जस्तोसुकै अपराधमा पनि कानुन नलाग्ने या कानुनले छुनै नसक्ने अवस्था सिर्जना गरिएको छ । उनीहरूका लागि अदालतदेखि प्रहरी प्रशासनसम्म सबैतिर सेटिङ हुन्छ । एउटै प्रकृतिका मुद्दामा शक्तिको छत्रछायामा हुनेले सजिलै उन्मुक्ति पाउँछ भने शक्तिमा नहुनेले जताबाट पनि लखेटिनुपर्छ । जुन पछिल्लो समयका कैयौँ मुद्दामा हामीले देखिरहेका पनि छौँ । 

राजनीतिक व्यक्ति जोडिएका घटनामा प्रहरीको अनुसन्धानमा राजनीतिक हस्तक्षेप कति हुन्छ ? 
राजनीतिक व्यक्ति जोडिएका प्रहरी अनुसन्धानमा हस्तक्षेपको सीमा नै हुँदैन । तर, कतिपय ‘प्रोफेसनल’ प्रहरी अधिकृतको ‘ब्युटी’ के छ भने उनीहरू कुनै पनि हस्तक्षेप या दबाबमा पछि हट्दैनन् । प्राफेसनल अधिकृत बरु आफ्नो करियर नै दाउमा राख्न तयार हुन्छन् । तर, कसैको दबाबसामु झुक्न तयार हुँदैनन् । म यो निर्देशन पालना गर्न सक्दिनँ, मलाई अन्यत्रै सरुवा गरिदिनुस् र तपाईंलाई अनुकूल हुने अधिकृत ल्याउनुस् भन्ने प्रहरी अधिकृत पनि छन् यहाँ । तर, यस्ता प्रोफेसनल अधिकृतको संख्या अत्यन्त कम छ । प्रहरीमा जो अवसरवादी अधिकृत छन्, तिनले माथिको निर्देशन पर्खेरै काम गर्छन् । निर्देशन पाउनासाथ नेतृत्वको ताबेदारी गर्नु उनीहरूका लागि सामान्य हुन्छ । त्यसैले, यस्तो हस्तक्षेपमा नेताहरू मात्र दोषी छैनन्, प्रहरी अधिकृत स्वयं पनि यसका लागि जिम्मेवार छन् । 

यस्ता विषयको अनुसन्धानमा प्रहरीले ऐन, कानुनमा टेकेर उभिन कति सम्भव छ ?
अहिलेका राजनीतिक नेतृत्वहरू शक्तिमा रहुन्जेल यस्तो सम्भावना अत्यन्त कम छ । त्यसको छाया हामीले देखिरहेका पनि छौँ । अहिले व्यक्तिको राजनीतिक रङ हेरेर मुद्दाको अनुसन्धान र अभियोजन भइरहेको लुकेको छैन । त्यसैले, प्रहरीले स्ट्यान्ड लिन निकै कठिन छ ।