- वि.सं २o८२ भदौ १३ शुक्रबार
सन् १८४२ : बेलायत र चीनबिच भएको ‘नान्किङ सम्झौता’ले तीन वर्षदेखि चलिरहेको पहिलो अफिम युद्ध अन्त्य गर्यो । चीनका लागि अत्यन्त अपमानजनक उक्त सम्झौताअनुरूप हङकङ बेलायतलाई हस्तान्तरण भयो । सन् १९९७ मा मात्र चीनले सो टापु फिर्ता पाएको हो ।
सन् ७०८ : जापानले ‘वादोकेइचिन’ नामको विश्वको पहिलो चाँदीको सिक्का निष्कासन गर्यो ।
सन् १६१२ : ‘सुभालीको युद्ध’मा इस्ट इन्डिया कम्पनीको फौजले सुरतनजिक पोर्चुगिज फौजलाई पराजित गर्यो । यस जितपछि भारतमा ब्रिटिस प्रभाव बढ्न सुरु भयो भने पोर्चुगिज प्रभाव घट्न थाल्यो ।
सन् १७९३ : फ्रान्सले आफ्नो उपनिवेश सेन्ट–डोमिन्गे (हालको हैटी)मा दासप्रथा अन्त्य गर्यो ।
सन् १८२५ : ब्राजिलले घोषणा गरेको तीन वर्षपछि अन्तत: औपनिवेशिक शक्ति पोर्चुगलले सो देशको स्वतन्त्रतालाई स्वीकार गर्यो ।
सन् १८८३ : अमेरिकी उद्योगी एन्ड्रयु कार्नेगिलले पहिलो ‘कार्नेगी पुस्तकालय’ स्कटल्यान्डको डनफर्मलिनमा खोले । पछि विश्वभर कुल २५०९ वटा कार्नेगी लाइब्रेरी खोलियो ।
सन् १८८५ : मोटरसाइकल आविष्कारका लागि गोटलिप डाइमलरले जर्मनीमा प्याटेन्ट हासिल गरे ।
सन् १९४७ : भारतको संविधानसभाले बिआर अम्बेडकरको संयोजकत्वमा अन्य ६ सदस्यलाई संविधान मस्यौदा तयार पार्ने जिम्मेवारी दियो ।
सन् १९४९ : सोभियत संघले ‘फस्र्ट लाइटनिङ’ उपनामको आणविक बमको सफल परीक्षण गर्यो । योसँगै संघ अमेरिकापछि आणविक बम सफल परीक्षण गर्ने दोस्रो मुलुक बन्यो ।
सन् १९८६ : मोरक्कोका राजा हसन द्वितीय र लिबियाका मुअम्मर गद्दाफीबिच दुई देशको राजनीतिक, आर्थिक एकता बलियो बनाउने सम्झौतामा हस्ताक्षर गरे । तथापि, यो सहमति दुई वर्ष पनि टिकेन ।
सन् १९९५ : बोस्नियन युद्धका क्रममा संयुक्त राष्ट्र संघद्वारा ‘सुरक्षित क्षेत्र’ घोषित क्षेत्रमा आक्रमण गर्ने तयारीमा रहेका सर्ब फौजलाई निरुत्साहित गर्न नेटोले बमबारी अभियान ‘अप्रेसन डेलिबेरेट फोर्स’ सुरु गर्यो ।
सन् १९९७ : मार्क र्यान्डोल्फ र रिड हास्टिङ्सले अनलाइनमार्फत डिभिडी भाडामा दिने सेवाका रूपमा नेटफ्लिक्सको स्थापना गरे ।
