बोलिभियामा दुई दशकपछि समाजवादीको शासन अन्त्य

दक्षिण अमेरिकी देश बोलिभियामा दुई दशकदेखि निरन्तर सत्तामा रहेका समाजवादीहरू अब सत्ताबाट बाहिरिने पक्का भएको छ । त्यहाँ सम्पन्न आमनिर्वाचनको प्रारम्भिक नतिजामा राष्ट्रपतिका मध्यमार्गी उम्मेदवार रोद्रिगो पाजले ३२.८ प्रतिशत मत ल्याई पहिलो स्थान हासिल गरेका छन् । दक्षिणपन्थी उम्मेदवार तथा पूर्वअन्तरिम राष्ट्रपति जर्ज ‘टुटो’ क्विरोगाले २६.४ प्रतिशत मत ल्याई दोस्रो भएका छन् । आधिकारिक परिणाम भने सात दिनभित्र आउनेछ ।

अब अक्टोबर १९ मा दुई उम्मेदवारबिच दोस्रो चरणको निर्वाचन हुनेछ । पहिलो चरणमै कुनै उम्मेदवारले निर्वाचन जित्न ५० प्रतिशत वा निकटतम प्रतिद्वन्द्वीभन्दा १० अंकको अन्तरले ४० प्रतिशत पार गर्नु आवश्यक थियो । क्रिस्चियन डेमोक्रेटिक पार्टी (पिडिसी) का मध्यमार्गी रोद्रिगो पाज वामपन्थी झुकाव राख्ने राष्ट्रपति जैमे पाज (कार्यकाल १९८९–९३)का छोरा हुन् । त्यस्तै, क्विरोगा सन् २००१ जुलाईमा एक वर्षका लागि राष्ट्रपति बनेका थिए ।

मध्यमार्गी र दक्षिणपन्थी उम्मेदवार दोस्रो चरणको चुनावमा जाँदै गर्दा पहिलोपटक समाजवादी आन्दोलनबाट उदाएको पार्टी मुभमेन्ट भर सोसलिजम (एमएएस)को शासन अन्त्य भएको छ । एमएएसले सन् २००५ देखि देशमा शासन गर्दै आएको थियो । आइतबारको राष्ट्रपति चुनावमा आठ राष्ट्रपति उम्मेदवार दौडमा थिए ।

पूर्ववामपन्थी राष्ट्रपति इभो मोरालेसलाई उम्मेदवार हुनबाट रोक लगाइएको थियो । त्यस्तै, मोरालेसका उत्तराधिकारी तथा निवर्तमान समाजवादी राष्ट्रपति लुइस आर्सेले गहिरिँदो आर्थिक संकटमाझ चुनावी दौडबाट बाहिरिएका थिए । वामपन्थी गठबन्धनभित्रको विभाजनका कारण एमएएसले कुनै उम्मेदवार नउठाई स्वतन्त्र उम्मेदवारलाई समर्थन जनाएको थियो ।

शनिबार राष्ट्रपतिको पदका लागि अतिरिक्त २६ वटा सिनेट पद र १३० डेपुटी पदका लागि पनि निर्वाचन भएको थियो । नवनिर्वाचित सबै अधिकारीले नोभेम्बर ८ मा पदभार ग्रहण गर्नेछन् ।