Skip This
नेपाल–भारत सीमावर्ती क्षेत्रस्थित सर्लाहीको बलरामा दुई समूहबिच विवाद हुँदा तीनजना घाइते भएका छन्।
गएराति ९ बजेको समयमा बलरा नगरपालिका– १ मा दुई समूहबिच मादक पदार्थ सेवनपछि विवाद भएको प्रहरीले जनाएको छ। सोही क्रममा छुरा प्रहार हुँदा तीनजना घाइते भएका जिल्ला प्रहरी कार्यालय सर्लाहीले जनाएको छ।
घाइते हुनेहरू सर्लाहीको बलरा नगरपालिका– १ बस्ने २५ वर्षका धर्मवीर सहनी, १८ वर्षका दशरथ सहनी र २५ वर्षका अमित मण्डल रहेका छन्। उनीहरूको पेट, घाँटी र हातमा चोट लागेको छ। घाइते तीनैजना उपचारपछि घर फर्किएका जिल्ला प्रहरी कार्यालयका प्रवक्ता प्रहरी नायब निरीक्षक सरोज राईले जानकारी दिए।
छुरा प्रहार गर्ने भारतीय नागरिकहरू अमन सिंह, विकास सिंह, अटल राय र अवशेख सिंह घटनालगत्तै भारततर्फ फरार भएका छन्। भारतीय प्रहरीसँगको समन्वयमा उनीहरूको खोजी भइरहेको प्रहरीले जनाएको छ।
