बिहानको समय यस्ता योगासन 

बिहान राम्रो भए सिंगो दिन राम्रो हुन्छ । यसकारण बिहानीलाई रमाइलो बनाउन योगले राम्रो भूमिका खेल्छ । योग गर्दा मन शान्त रहन्छ, शरीर उत्साह र उमंगले भरिन्छ । बिहानको समयमा योग गर्दा फ्रेस महसुस हुने मात्रै होइन, शरीरको ऊर्जा पनि बढ्छ । तर, कुनै पनि योगासन विज्ञसँग परामर्श गरेर मात्रै सुरु गर्नु राम्रो हुन्छ । बिहानीमा गर्न सकिने केही योगासनबारे यहाँ चर्चा गरिन्छ ।

सूर्य नमस्कार : शरीरलाई स्वस्थ र तन्दुरुस्त राख्नका लागि सूर्य नमस्कारको अभ्यास निकै राम्रो मानिन्छ । यसभित्र विभिन्न योगासन छन् । बिहानी सूर्यको किरणको स्पर्शमा सूर्य नमस्कार गर्नाले शरीरमा ऊर्जा र भिटामिन डी मिल्छ । जसले मानसिक तनावसमेत कम गर्छ । तौल सन्तुलित हुन्छ । 

भुजंगासन : भुजंगासनले शरीर र ढाडलाई बलियो बनाउँछ । पेटको बोसो घटाउन पनि यो निकै प्रभावकारी छ ।

ताडासन : यो आसनले घुँडालाई मजबुत बनाउँछ । शारीरिक र मानिसक सन्तुलन विकास गर्छ । करङलाई स्वस्थ र बलियो बनाउँछ । 

त्रिकोणासन : यसले एसिडिटीबाट छुटकारा दिलाउँछ । पाचन प्रक्रियालाई दुरुस्त राख्छ । चिन्ता, तनाव, कम्मर तथा पिठ्युँमा हुने दुखाइ कम गर्छ । गर्धन, पिठ्युँ, कम्मर र खुट्टाका नसा मजबुत बनाउँछ । 

बालासन : केही कठिन आसनको अभ्यासपछि बालासन गरेर शरीरलाई आराम प्रदान गर्न सकिन्छ । डिप्रेसन, माइग्रेनलगायत समस्या कम गर्न यसले निकै ठुलो भूमिका खेल्छ । रक्तसञ्चार ठिक गर्छ । पिठ्यँु र कम्मरको दुखाइ कम गर्छ ।