थाइल्यान्डको बैंक मेनेजर बनेर फेसबुकमार्फत ६२ लाख रुपैयाँ ठगी गर्ने युवक पक्राउ   

सामाजिक सञ्जाल फेसबुकमार्फत ६२ लाख ७५ हजार २ सय रुपैयाँ ठगी गरेका युवकलाई प्रहरीले नेपाल–भारत सीमा क्षेत्रबाट पक्राउ गरेको छ। 

सुनसरीको देवानगन्ज गाउँपालिका–१ का २० वर्षीय कुशेश्वर मेहतालाई प्रहरीले पक्राउ गरेको छ। उनले, ‘भानिदा सुवन’ नामको नक्कली फेसबुक आइडी बनाई आफूलाई ‘फुइङ भानिदा’ नामक थाइल्यान्डको नागरिक सिएम कमर्सियल बैंकका मेनेजर भएको परिचय दिँदै आएका थिए।  

उनले आफ्नो परिचय दिँदै एलेन अर्बी शाही नामक व्यक्तिको सो बैंकमा खाता रहेको, निजको कोही पनि नातेदार नभएको र पीडित कुर्मराज शाहीको जात मिल्ने भएकाले सो खातामा रहेको सम्पूर्ण रकम तपाईँको नाममा राखिदिन्छु भनी झुटा प्रलोभन देखाउँदै रकम ठगी गरेको जिल्ला प्रहरी कार्यालय सुनसरीका प्रहरी प्रवक्ता योगराज खतिवडाले जानकारी दिए। 

प्रवक्ता खतिवडाका अनुसार उक्त प्रलोभनमा परी पीडित कुर्मराज शाहीले विभिन्न मितिमा मेहताको नाममा रहेको बैंक खातामा जम्मा रु. ६२ लाख ७५ हजार २०० पठाएका थिए। अनुसन्धानका क्रममा पीडितलाई झुटो विश्वास दिलाई ठगी गरिएको पुष्टि भएको प्रवक्ता खतिवडाले  बताए। 

लामो समयदेखि फरार रहेका मेहतालाई जिल्ला प्रहरी कार्यालयको टोलीले मंगलबार साँझ सुनसरीको कोशी गाउँपालिका–८ भन्टाबारीस्थित नेपाल–भारत सीमा क्षेत्रनजिकै लुकिछिपी बसेको अवस्थामा पक्राउ गरेको जनाइएको छ। प्रवक्ता खतिवडाका अनुसार पक्राउ परेका मेहतालाई थप अनुसन्धान र आवश्यक कानुनी कारबाहीका लागि नेपाल प्रहरी प्रधान कार्यालय, साइबर ब्युरो भोटाहिटी, काठमाडौं पठाइएको छ।