Skip This
गर्मी सुरु भएसँगै आगलागीका घटना वृद्धि भई जनधनको क्षति हुन थालेकामा प्रतिनिधिसभाका सांसदले सरकारको ध्यानाकर्षण गराएका छन् ।
प्रतिनिधिसभाको आजको बैठकको आकस्मिक समयमा सांसद सपना राजभण्डारीले काठमाडौं महानगरपालिका– २४, मखनस्थित दयाराम श्रेष्ठको घरमा बुधबार आगलागी भई ८० वर्षीया वृद्धाको निधन भएको घटनामा ग्यास लिक भएर आगलागी भएकाले ग्यास सिलिन्डरको अनुगमन गर्न माग गरिन् । केही वर्षअघि कमलपोखरीमा पनि यस्तै घटना भई एक कामदारको निधन भएको घटनाको स्मरण गराउँदै उनले बजारबाट वितरण भइरहेको ग्यासको अनुगमन नभएको बताइन् ।
काठमाडौंका भित्री सहरका ठाउँठाउँमा अग्नि नियन्त्रक राख्न पनि सांसद राजभण्डारीले माग गरिन् । ग्यास सिलिन्डर र पेट्रोल पम्पका कारण आगलागीको जोखिम बढेकाले यसबाट सुरक्षित हुने अवस्था निर्माणका लागि उनले सरकारको ध्यानाकर्षण गराइन्।
सांसद ठाकुर गैरेले आर्थिक अनुशासन कायम हुन नसकी बेरुजु वृद्धि भएर अर्थतन्त्रमा असर पर्न सक्ने भएकाले आर्थिक अनुशासन कायम गर्न माग गरे । अहिले रु. सात खर्ब ३३ अर्बभन्दा बढी बेरुजु वृद्धि भएको महालेखाको प्रतिवेदनमार्फत सार्वजनिक भएको उनले उल्लेख गरे । अर्थ मन्त्रालयमै धेरै बेरुजु रहेको तथ्य बाहिर आएकामा सांसद गैरेले यस्तो अर्थतन्त्रले पर्न सक्ने प्रभावको विश्लेषण गरेर काम गर्न ध्यानाकर्षण गराए।
सांसद देवेन्द्र पौडेलले धादिङबाट पोखरा जाँदै गरेको माइक्रो बस दुर्घटनामा परी घाइते भएकाको उपचारको व्यवस्था गर्न सरकारसँग माग गरे। सांसद अशोककुमार चौधरीले बुधबार मखनको आगलागीमा परी ८० वर्षीया वृद्धाको मृत्यु भएको घटना र आज बिहान सतुंगलमा भएको आगलागीले ठुलो क्षति भएको बताए ।
आगलागी तत्काल निभाउन सबै स्थानीय तहमा दमकल छ–कि छैन भनी प्रश्न गर्दै उनले भित्री सहरमा आगलागी नियन्त्रणका व्यवस्था गर्न माग गरे ।
सांसद डा. अमरेशकुमार सिंहले गभर्नर नियुक्तिमा ढिलाइ भइरहेकामा आपत्ति जनाउँदै सरकारले कानुन उल्लंघन गरिरहेको बताए । दलीयभन्दा गभर्नरमा स्वतन्त्र व्यक्ति नियुक्त गर्न उनले माग गरे।
