बाजुरा जिल्लाको बडीमालिका नगरपालिका– ६ कोर्धमा आइतबार राति आगलागी हुँदा तीन घर जलेर पूर्ण रूपमा नष्ट भएका छन्।
अम्म बडुवाल, बलबहादुर बडुवाल र बादुरे बडुवालको सँगै जोडिएका तीनतले घरमा आगलागी भएको जिल्ला प्रहरी कार्यालय बाजुराले जानकारी दिएको छ। दिउँसो कामबाट सदस्यहरू घर नफर्कँदै साँझ ७ बजेतिर घरमा आगोको मुस्लो देखिएको थियो।
बिजुलीको तार सर्ट भएर आगलागी भएको र आगलागीबाट लत्ताकपडा, खाद्यान्नसहित सबै सामान जलेर नष्ट भएको छ। मानवीय र पशुचौपायाको क्षति भने नभएको प्रहरीले जनाएको छ।
आगो स्थानीयवासी र जिल्ला प्रहरी कार्यालयबाट गएको टोलीले नियन्त्रणमा लिएका थिए।