‘स्ट्रिप, रोप लाइट’ जडान गरिएपछि धनगढीको ६ लेन सडक झिलिमिली बनेको छ । धनगढी उपमहानगरपालिकाले ६ लेन सडकअन्तर्गत धनगढीको भन्सार रोडदेखि मोहनपुरसम्म स्ट्रिप, रोप लाइट जडान गरेको हो । यसले रातिको समयमा ६ लेन सडक झिलिमिली मात्र बनेको छैन, सुन्दर र आकर्षक पनि देखिएको छ ।
३१ लाख रुपैयाँको लागतमा ६ लेन सडकमा दुई सय ५६ वटा पोल र एक सय ४० वटा ट्रिगार्डमा स्ट्रिप, रोप जडान गरिएको उपमहानगरले जनाएको छ । त्यस्तै करिब तीन लाख रुपैयाँको लागतमा नेपाल–भारत सीमानजिक कैलाली भन्सारको गेटमा ‘फ्लोड लाइट’ जडान गरिएको छ ।
उपमहानगरपालिकाले धनगढी विमानस्थलदेखि ६ लेन सडक जोड्ने सडकमा स्ट्रिप लाइट जडान गरेको छ । सुदूरपश्चिम प्रदेशका भौतिक पूर्वाधार विकासमन्त्री प्रकाश देउवाले स्ट्रिप लाइटको उद्घाटन गरे । १० लाख रुपियाँ लागतमा स्ट्रिप लाइट जडान गरिएको हो ।
नगर प्रमुख गोपाल हमालले सुदूरपश्चिम प्रवेश गर्ने हवाई मार्ग धनगढी विमानस्थल जाने सडक राति अँध्यारो रहेकाले स्ट्रिप लाइट जडान गरिएको बताए । यो सडकमा स्ट्रिप लाइट लगाउन नागरिक उड्ययन प्राधिकरणलाई पटकपटक आग्रह गरे पनि सुनुवाइ नभएपछि उपमहानगरपालिकाले आफ्नै लगानीमा लाइट जडान गरेको हमालले बताए ।