नेपाल उद्योग परिसंघ (सिएनआई) र अमेरिकन चेम्बर अफ कमर्स (एमच्याम)बीच लगानी अभिवृद्धि तथा नेपाल–अमेरिकाबीच व्यावसायिक वातावरण सुदृढ गर्न र सहकार्य गर्न सम्झौता भएको छ । परिसंघका अध्यक्ष राजेशकुमार अग्रवाल र अमेरिकन चेम्बर अफ कमर्सका अध्यक्ष निर्मलकाजी श्रेष्ठले मंगलबार सम्झौतापत्रमा हस्ताक्षर गरेका हुन् ।
सम्झौताअनुसार दुई संस्थाल नेपाल–अमेरिकाका उद्यमीबीच सम्पर्क बिन्दुका रूपमा काम गर्नेछन् । साथै, संस्थाले नेपालमा लगानी गर्न इच्छुक अमेरिकी लगानीकर्तालाई लगानीसम्बन्धी जानकारी दिने, पारस्परिक उद्देश्य पूरा गर्न नीतिगत सुधारको वकालत गर्ने कार्यमा सहकार्य गर्ने र नेपालमा अमेरिकी लगानी बढाउन रणनीति सञ्चालन गर्नेछन् । बजारमा आधारित वित्तीय र गैरवित्तीय सेवामा पहुँच बढाउन आइटी क्षेत्रका लागि लगानी र व्यवसाय वातावरण सुधारमा काम गर्ने पनि सम्झौतापत्रमा उल्लेख छ ।
परिसंघ अध्यक्ष अग्रवालले यो सहकार्यले नेपाल र अमेरिकालाई व्यावसायिक रूपमा जोड्न पुलका रूपमा काम गर्ने बताए । ‘सम्झौतापछिको सहकार्यले ज्ञान र सीपका आदानप्रदान, नवप्रवर्तन तथा नयाँ सहकार्यका बाटो खुला गर्ने, विश्वव्यापी बजारमा प्रतिस्पर्धा गर्ने, विदेशी लगानी आकर्षित गर्न औद्योगिक विकासका लागि योगदान गर्न मद्दत गर्छ,’ अध्यक्ष अग्रवालले भने ।
त्यस्तै, एमच्यामका अध्यक्ष श्रेष्ठले उद्योगीहरूको साझा संस्था परिसंघको सहकार्यले अमेरिकी लगानी अभिवृद्धि गर्दैै मुलुकको अर्थतन्त्र विकासका लागि प्रभावकारी रूपमा काम गर्ने बताए ।