मुख्य समाचार प्रिन्ट संस्करण

हरि रिजाललाई दुई मतले हराउँदै एमाले लुम्बिनीको अध्यक्षमा राधाकृष्ण कँडेल विजयी

नेकपा एमालेको लुम्बिनी प्रदेशको पहिलो अधिवेशनले अध्यक्ष पदमा पाल्पाका राधाकृष्ण कँडेल विजयी भएका छन् । सहमतिको प्रयास सफल नभएपछि मतदानबाट कँडेल प्युठानका हरि रिजाललाई दुई मतले हराउँदै विजयी भएका हुन् । 

कँडेलले चार सय ७९ मत ल्याएर विजयी भए भने रिजालले चार सय ७७ मत ल्याए । मंगलबार दिउँसो भएको निर्वाचनमा प्रदेशका एक हजार पाँच प्रतिनिधिमध्ये नाै सय ६५ जनाले मतदान गरेका थिए । कँडेल उपाध्यक्ष विष्णु पौडेल र रिजाल महासचिव शंकर पोखरेलनिकटका हुन् । 

कँडेल एमालेको लुम्बिनी प्रदेशको तदर्थ समितिका अध्यक्ष हुन् भने रिजाल केन्द्रीय सदस्य हुन् । एमालेको प्रदेश अधिवेशनअन्तर्गत सुरुमै लुम्बिनीमा गर्न लागिएको पहिलो प्रदेश अधिवेशनमा सहमति प्रयास असफलपछि एमालेको लुम्बिनी प्रदेश अधिवेशनमा नेतृत्व मतदानबाट टुंगो लागेको हो । 

एमाले अध्यक्ष केपी ओलीले लुम्बिनी प्रदेशको नेतृत्व सहमतिबाट चयन गर्न विशेष जोड गर्दै बुटवलमा नेता तथा प्रतिनिधिहरूलाई निर्देशन दिएर फर्किए पनि यहाँ सहमति जुट्न नसकेपछि मतदानबाट नेतृत्व चयन गरिएको हो । यहाँ दुई पक्ष अघोषित रूपमा प्यानल बनाएर चुनावी मैदानमा भिडेका थिए । परिणामअनुसार पदाधिकारीमा कँडेल पक्ष बहुमतसहित विजयी भएको छ । 

अध्यक्ष कँडेलसँगै उपाध्यक्षमा रुपन्देहीका भोजप्रसाद श्रेष्ठ, पुरुष उपसचिवमा रोल्पाका पूर्ण बुढामगर र महिला उपसचिवमा बर्दियाकी लीला रानामगर निर्वाचित भएका छन् । सचिव पदमा यसअघि नै दाङका लक्ष्मण आचार्य निर्विरोध निर्वाचित भएका थिए । निर्वाचितमध्ये पुरुष उपसचिवमा रोल्पाका बुढामगर मात्र रिजाल प्यानलका हुन् ।

पदाधिकारीमा सचिवसहित भूगोलतर्फ १२ मध्ये आठ जिल्लाका सदस्य निर्विरोध निर्वाचित भएका थिए । पाँच पदाधिकारीमध्ये चार पदमा निर्वाचन भएको थियो । यसबाहेक भूगोलतर्फ रुपन्देही, गुल्मी, बाँके र दाङ जिल्ला गरी चार जिल्ला, लेखा कमिटी र प्रदेश खुलातर्फ मतदान भएको थियो ।

उपाध्यक्षमा निर्वाचित कँडेल पक्षका श्रेष्ठले चार सय ५५ मत ल्याएर विजयी भएका छन् । उपाध्यक्षमा रुपन्देहीका विश्वराज बरालले तीन सय ६, बाँकेका पुजन विश्वकर्माले ९८, रुकुमका शान्तकुमार वलीले ५६ मत ल्याएका थिए । बराल रिजाल समूहका हुन् । अन्य दुईजनाले छुट्टै उम्मेदवारी गरेर प्रतिस्पर्धा गरेका थिए । 

त्यस्तै, उपसचिव खुलामा बुढामगर चार सय १८ मत ल्याएर निर्वाचित भएका छन् । उनीसँगै बाँकेका दुर्गाप्रसाद थारू चौधरीले तीन सय ९३, रोल्पाका उपेन्द्रलाल कामीले एक सय १० मत ल्याएका थिए । चौधरी कँडेल प्यानलबाट निर्वाचन लडेका थिए ।

महिला उपसचिवमा लीला रानामगर तीन सय ५२ मत ल्याएर विजयी भएकी छिन् । उनले रिजाल समूहकी वसन्ती अधिकारीलाई एक मतले पराजित गरेकी हुन् । अधिकारीले तीन सय ५१ मत ल्याएकी छिन् । 

यस्तै, लेखा समिति अध्यक्षमा कँडेल समूहकै दामोदर घिमिरे विजयी भएका छन् । उनले रिजाल समूहका विष्णुराज बिसीलाई दुई सय सात मत अन्तरले पराजित गरे । लेखा समितिको उपाध्यक्षमा वैकुण्ठ महत निर्विरोध निर्वाचित भए । मतदानमा नाै सय ६५ मत खसेको थियो । अधिवेशनमा कुल एक हजार चारजना मतदाता रहेकोमा नाै सय ६५ मत खसेको थियो ।

पौडेल र पोखरेलनिकटका उम्मेदवार चुनावी मैदानमा उत्रिएकाले लुम्बिनी प्रदेश अधिवेशनलाई एमालेका दुई शीर्ष नेता पौडेल र पोखरेलको शक्ति परीक्षणका रूपमा समेत लिइएको थियो ।  रुपन्देही पौडेल र दाङ पोखरेलको गृहजिल्ला हो ।

एमालेको केन्द्रीय सचिवालयले प्यानल प्रतिस्पर्धामा रोक लगाएको भए पनि यहाँ प्रतिस्पर्धामा रहेका कँडेल र रिजाल समूह आन्तरिक रूपमा केही पदमा टिम निर्माण गरेर चुनावी मैदानमा उत्रिएका थिए । अधिवेशनको उद्घाटन समारोहमा नेताहरू पौडल र पोखरेलले आफूहरू गुटबन्दीमा नरहेको दाबी गरेका थिए । 

त्यस्तै, अन्य नेताहरूले समेत पार्टीमाथि चौतर्फी आक्रमण भइरहेको भन्दै  गुटबन्दी गर्न नहुनेमा जोड दिएका थिए । लुम्बिनीमा यसअघि पाँच सय ७६ सदस्यीय प्रदेश संगठन कमिटी रहेकोमा अधिवेशनले दुई सय पाँच सदस्यीय कमिटी बनाएको छ । 

अधिवेशनमा १२ वटै जिल्लाका ८२ हजार आठ सय ९५ पार्टी सदस्यबाट छानिएका प्रतिनिधि तथा विभिन्न २३ वटा जनसंगठनबाट छानिएका एक हजार चार प्रतिनिधि सहभागी थिए ।