बुधबार हुने उद्योग वाणिज्य महासंघको निर्वाचनमा उद्योगी शिवप्रसाद घिमिरेले केन्द्रीय सदस्य पदका लागि उम्मेदवारी घोषणा गरेका छन् । यसअघि एक कार्यकाल केन्द्रीय सदस्य भइसकेका घिमिरेले महासंघको वस्तुगत समितिमार्फत केन्द्रीय सदस्य पदमा उम्मेदवारी दिएका हुन् । यो समूहबाट एक उपाध्यक्षसहित १४ जना केन्द्रीय सदस्य निर्वाचित हुने प्रावधान छ । घिमिरेलाई ग्यास उद्योग संघका तर्फबाट मनोनयन गरिएको छ । उनी संंघको पूर्वअध्यक्ष हुन् । 

घिमिरेले वरिष्ठ उपाध्यक्षका उम्मेदवार अञ्जन श्रेष्ठको प्यानलबाट केन्द्रीय सदस्य पदमा उम्मेदवारी दिएको जानकारी दिए ।

पेट्रोलियम तथा ग्यास उद्योगमा घिमिरेको मुख्य लगानी छ । उनी सबैभन्दा धेरै ग्यास उद्योगका सञ्चालकसमेत हुन् । उनको स्वामित्वमा एभरेष्ट, त्रिशूल, प्रिमा, सैपाल, सहारा, सुगम र कामख्या गरी सात ग्यास उद्योग छन् । त्यस्तै सुनसरी, बारा र काठमाडौंमा गरी पाँचवटा पेट्रोल पम्प सञ्चालन गरिरहेका छन् ।

उनी निर्यातमूलक कत्था उत्पादक संघको अध्यक्षसमेत हुन् । उनले सिन्धुलीमा चुनढुंगा खानी रहने गरी गरुड सिमेन्ट उद्योग सञ्चालनको प्रक्रिया सुरु गरेका छन् । उनको लगानीमा बझाङ, संखुवासभा र भोजपुरमा पाँचवटा जलविद्युत् आयोजना निर्माणाधीन अवस्थामा छन् ।

उनले नेपालमै विद्युतीय सवारीसाधनको उत्पादन गर्ने उद्देश्यले बारामा प्लान्ट निर्माण प्रक्रियासमेत अघि बढाइसकेका छन्। उनको व्यापार, उत्पादन–निर्माण, जलविद्युत्, पेट्रोलियम, सेवा, कृषि र बैंकिङ क्षेत्रमा गरी कुल ३९ वटा उद्योग, व्यवसाय छन् । घिमिरेले महासंघको केन्द्रीय सदस्यमा उम्मेदवारी दिँदै देशको अर्थतन्त्र सबलीकरणमा योगदान गर्ने र निजी क्षेत्रको मनोबल वृद्धि गर्ने उद्देश्य राखेको बताए ।