सरकार पूर्णतामा ढिलाइ : शेखर–गगनको बटमलाइनले कांग्रेसमा सकस, चुनावपछि टुंग्याउने जसपाको संकेत
कांग्रेसले पाएका आठमध्ये तीन मन्त्रालय चाहिने शेखर कोइराला–गगन थापा समूहको बटमलाइन, दुई मात्रै दिने शेरबहादुर देउवाको अडान
सत्तारूढ दल कांग्रेसभित्र मन्त्रालय बाँडफाँट नमिल्दा सरकारलाई पूर्णता दिने प्रधानमन्त्रीको प्रयास लम्बिएको छ । प्रधानमन्त्री पुष्पकमल दाहाल प्रचण्डले बुधबार एक कार्यक्रममा एक–दुई दिनभित्र मन्त्रिपरिषद्ले पूर्णता पाउने अभिव्यक्ति दिए पनि मन्त्रालय लेनदेनमा कांग्रेसभित्रको किचलो टुंगिएको छैन ।
पछिल्लोपटक प्रधानमन्त्रीले १७ चैतमा सातौँपटक मन्त्रिपरिषद् विस्तार गरेका थिए । तर, अझै ६ मन्त्रालय प्रधानमन्त्रीसँगै छन् । कांग्रेसले पाएका चार, जसपाले पाएको एक र जनमतका मन्त्रीले राजीनामा दिएपछि रिक्त एक गरी ६ मन्त्रालय प्रधानमन्त्रीमातहत नै छन् ।
कांग्रेसले नाम नपठाउँदा कानुन, न्याय तथा संसदीय मामिला, परराष्ट्र, युवा तथा खेलकुद र स्वास्थ्य तथा जनसंख्या, जसपाले नाम पठाउन बाँकी वन तथा वातावरण र जनमत सरकारबाट बाहिरिएपछि खानेपानी मन्त्रालयको जिम्मेवारी प्रधानमन्त्रीसँग रहेको हो ।
कांग्रेसको आन्तरिक विवादले मन्त्रीको नाम टुंगो नलाग्दा मन्त्रिपरिषद्ले पूर्णता पाउन नसकेको हो । शेखर कोइराला र गगन थापा समूहले चारमध्ये तीन मन्त्रालयलाई बटमलाइन बनाएपछि नाम टुंग्याउन सकस परेको कांग्रेसका एक नेताले बताए ।
इतरलाई दुई मन्त्रालय मात्रै दिने सभापति शेरबहादुर देउवाको अडान छ । उनी इतरलाई दुई मन्त्री र एक राज्यमन्त्री दिन सकारात्मक छन् । नाम टुंग्याउन कांग्रेसका नेताहरू आन्तरिक छलफलमा छन् ।
बुधबार बिहान सभापति देउवा, महामन्त्री थापा र कांग्रेस प्रवक्ता तथा अर्थमन्त्री डा. प्रकाशशरण महतबीच धुम्बाराहीमा छलफल भएको थियो । दुवै पक्ष अडानमा अडिग रहेपछि निष्कर्षमा पुग्न सकेन । ‘दुवैतर्फको अडान कायम छ, बुधबार साँझसम्म कुनै प्रगति छैन,’ स्रोतले भन्यो ।
डा. नारायण खड्काले सभापति देउवा निरन्तर छलफलमा रहेको र छिट्टै नाम टुंगो लाग्ने दाबी गरे । उनले यसकै आधारमा प्रधानमन्त्री प्रचण्डले केही दिनभित्र सरकारले पूर्णता पाउने बताएको जिकिर गरे । ‘सभापतिले पार्टीमा पनि छलफल गरिरहनुभएको छ । प्रधानमन्त्रीसँग पनि निरन्तर संवादमा हुनुहुन्छ । प्रधानमन्त्रीले पनि मन्त्रिपरिषद्ले छिट्टै पूर्णता पाउँछ भनेर आत्मविश्वासका साथ भन्नुभएको छ । शीर्ष तहको संवादकै आधारमा प्रधानमन्त्रीको भनाइ आएको हुुनुपर्छ । छिट्टै कांग्रेसले मन्त्री पठाउनेछ,’ उनले भने ।
सभापति देउवाले संस्थापनबाट मोहन बस्नेत र एनपी साउदको नाम टुंगो लगाएका छन् । साउदलाई परराष्ट्र र बस्नेतलाई खेलकुद मन्त्रालयमा पठाउने देउवाको योजना रहेको निकट नेताहरू बताउँछन् । ‘संस्थापनबाट बस्नेतलाई खेलकुद र साउदलाई परराष्ट्रमा पठाउने गरी नाम टुंगो लागेको छ । शेखर–गगन समूहलाई दुई मन्त्री र एक राज्यमन्त्री दिने प्रस्ताव गएको छ । तर, इतरले तीनवटै दाबी गरेर नाम नपठाएकाले रोकिएको छ,’ देउवानिकट स्रोतले भन्यो ।
इतर समूहमा उपसभापति धनराज गुरुङ, सहमहामन्त्रीद्वय बद्री पाण्डे, जीवन परियार र डिगबहादुर लिम्बूको नाम चर्चामा छ । यसबाहेक महामन्त्रीद्वयले स्वास्थ्यमन्त्रीका रूपमा युवा नेता प्रदीप पौडेललाई अघि सारे पनि देउवा सकारात्मक नदेखिएको कांग्रेस नेताहरूकै भनाइ छ ।
प्रधानमन्त्रीका राजनीतिक सल्लाहकार हरिबोल गजुरेलले कांग्रेसले प्रधानमन्त्रीलाई बिहीबारभित्रै नाम टुंगो लगाउने जानकारी गराएको बताए । उनका अनुसार उद्योग वाणिज्य मन्त्रालय नपाएपछि खानेपानी मन्त्रालयबाट राजीनामा दिएको जनमतसँग छलफल भइरहेको उनले बताए । ‘कांग्रेसले बिहीबारभित्र चार मन्त्रीको नाम पठाउने जानकारी गराएको छ । जसपाबाट कहिले नाम पठाउने भन्ने टुंगो लागिसकेको छैन । जनमतले खानेपानी मन्त्रालयमा सहमति जनाएर पछि सरकार छाडेको अवस्था छ । उहाँहरूसँग पनि छलफल भइरहेको छ,’ उनले नयाँ पत्रिकासँग भने ।
जसपाले उपनिर्वाचनपछि मन्त्री पठाउने संकेत गरेको छ । अध्यक्ष उपेन्द्र यादव बारा २ मा गठबन्धनका तर्फबाट उम्मेदवार छन् । जसपा प्रवक्ता मनीष सुमनले आफ्नो पार्टीले पाउने मन्त्रालयबारे छलफल भइरहेकाले नाम नपठाइएको दाबी गरे । कांग्रेसले टुंग्याए आफ्नो पार्टीले तुरुन्तै नाम दिने सुमनले बताए ।
‘हामीले तीन मन्त्रालयमा दाबी गरेका हौँ । राज्यमन्त्रीसहित तीन मन्त्रालय या तीन फुल मन्त्रालय भन्ने टुंगो लागेको छैन । प्रधानमन्त्रीले स्पष्ट पारेपछि हामी नाम पठाउँछाैँ,’ उनले भने, ‘पार्टीमा कुनै विवाद छैन । कांग्रेस र हाम्रो मन्त्रीले एकैपटक शपथ खाने सम्भावना पनि छ । पार्टी नेतृत्व उपनिर्वाचनमा केन्द्रित भएकाले निर्वाचनपछि सरकारमा सहभागिताको सम्भावना पनि छ ।’
सरकार विस्तारअघि नै जसपाले वन तथा वातावरण मन्त्रालय पाउने टुंगो लागेको थियो । तर, जसपाले आफूले पाएका दुई मन्त्रालयमध्ये शिक्षा मन्त्रालयमा मात्रै मन्त्री पठाएको छ ।