१७औँ वार्षिकोत्सव विशेषांकफ्रन्ट पेजमुख्य समाचारसमाचारदृष्टिकोणअर्थअन्तर्वार्ताखेलकुदविश्वफिचरप्रदेशपालिका अपडेट
  • वि.सं २०८१ बैशाख १२ बुधबार
  • Wednesday, 24 April, 2024
२०७९ चैत १४ मंगलबार २०:००:००
Read Time : < 1 मिनेट
खेलकुद डिजिटल संस्करण

दीपकराजसिंह ठकुरीको गोलसँगै नेपाल फाइनलमा, ९० मिनेटसम्म अग्रता लिएको भुटान अन्तिममा निराश

Read Time : < 1 मिनेट
२०७९ चैत १४ मंगलबार २०:००:००

९०औँ मिनेटमा दीपकराजसिंह ठकुरीको आकर्षक हेडर गोल मद्दतले नेपाल प्रधानमन्त्री थ्री नेसन्स कप फुटबल प्रतियोगिताको फाइनल प्रवेश गरेको छ । 

मैदान प्रवेश गरेलगत्तै कर्नरकिक लिन पुगेका अनुभवी भरत खवासले प्रहार गरेको कर्नर किकमा अनन्त तामाङले हेडर गर्दै बललाई गोलपोस्टतर्फ दिशा दिएका थिए । त्यसलाई हेडरमै सटिक प्रहार गर्दै दीपकले बललाई जाली चुमाए ।

साे गाेलसँगै दशरथ रंगशालामा मंगलबार भएको अन्तिम खेलमा नेपालले भुटानलाई १–१ ले बराबरी रोक्दै फाइनलमा स्थान बनायाे । बराबरी नजितासँगै भुटान प्रतियोगिताबाट बाहिरिएको छ ।

जितसँगै नेपाल एक जित र एक बराबरीसहित ४ अंकसहित फाइनलमा प्रवेश गरेको हाे । नेपालसँगै लाओस प्रतियोगिताको फाइनलमा प्रवेश गरेको छ । 

नेपाल दुई खेलबाट चार अंक बटुल्दै शीर्ष स्थानमा रह्यो । लाओसले दुई खेलबाट तीन अंक जोड्दै दोस्रो स्थानमा रहँदै फाइनल स्थान बनाएको हो । भुटानले दुई खेलबाट एक अंक जोडेको छ । नेपालले यसअघि पहिलो खेलमा लाओसलाई २–० ले हराएको थियो । लाओसले भुटानलाई २–१ ले हराएको थियो ।

राष्ट्रिय टिमबाट आफ्नो दोस्रो खेल खेलिरहेका दीपकले पहिलो गोल गरे । जारी सहिद स्मारक ए डिभिजन लिगका पाँच खेलमा चार गोल गरेका दीपकले आफ्नो उपस्थितिलाई राष्ट्रिय टिममा प्रमाणित गरेका छन् । 

खेलको निर्धारित ९० मिनेट सुरु हुनुअघिसम्म भुटान खेलमा १–० को अग्रतामा थियो । १३ वर्षको इतिहासमा पहिलोपटक नेपाललाई हराउँदै प्रतियोगितामा फाइनल पुग्न अग्रसर बनिरहेको भुटानले अन्तिम केही मिनेट खेलमा नियन्त्रण गुमाउँदा प्रतियोगिताबाट बाहिरिएको छ । 
अब नेपाल र लाओसबीच १७ गते फाइनल खेल हुनेछ ।