राष्ट्रपति विद्यादेवी भण्डारीले निर्वाचन आयोगको निर्णयअनुसार जरिवानामा परेका स्थानीय तहका उम्मेदवारले जरिवाना मिनाहा गरेकी छन् ।
बिहीबार बसेको मन्त्रिपरिषद् बैठकले राष्ट्रपतिसमक्ष जरिबाना मिनाहाको सिफारिस गरेको थियो ।
नेपालको संविधानको धारा २७६ बमोजिम राष्ट्रपतिले जरिबानामा माफी मिनाहा गरेको राष्ट्रपति कार्यालयका सहायक प्रवक्ता लीलाकान्त पौडेलले जारी गरेको विज्ञप्तिमा उल्लेख छ ।
गत ३० वैशाखमा स्थानीय तहको निर्वाचनमा उम्मेदवार भई खर्च विवरण नबुझाएर जरिबानामा परेका जनप्रतिनिधिहरूले गत २२ माघमा गृह मन्त्रालयमार्फत राष्ट्रपतिलाई मिनाहाका लागि अनुरोधपत्र पठाएका थिए ।
निर्वाचन खर्चको विवरण नबुझाएको कारण आयोगले एक लाख २३ हजार ६ सय ५० जना उम्मेदवारलाई आर्थिक जरिवानाको कारबाही गरेको थियो ।