- वि.सं २o८२ भदौ १५ आइतबार
एसियाली फुटबल महासंघ (एएफसी)ले अन्तर्राष्ट्रिय मान्यता प्राप्त खेलको लागि अयोग्य घोषणा गरेको दशरथ रंगशालामा रग्बी सिरिज हुने भएको छ।
त्रिपुरेश्वरस्थित रंगशालामा भदौ अन्तिम साता नेपाल रग्बी संघको आयोजनामा नेपाल–बंगलादेश अन्तर्राष्ट्रिय रग्बी सिरिजको दोस्रो संस्करण हुन लागेको हो। सिरिजमा ३० भदौमा रग्बी सेभेन्सका दुई तथा ३१ भदौमा फिफ्टिन्सको एक खेल हुने आयोजक संघका अध्यक्ष दीपक देवकोटाले आइतबार आयोजित पत्रकार सम्मेलनमा जानकारी गराए।
सिरिज सञ्चालन गर्न करिब ३५ लाख खर्च हुने आयोजकले जनाएको छ। सिरिजको पहिलो संस्करण बंगलादेशको ढाकामा सन् २०२२ मा भएको थियो।
यता, एएफसीले भने यसै वर्ष हुने मलेसिया र भियतनामको खेल दशरथ रंगशालामा गर्न नसकिने अखिल नेपाल फुटबल संघ (एन्फा)लाई जनाएको छ। विशेषतः रंगशालामा सिट नम्बर व्यवस्थित नभएको तथा दर्शक, भिआइपी, मिडिया प्रवेश गर्ने एउटै गेट भएको तर्क एएफसीले गरेको छ।
यस्तै, फ्लडलाइट र मैदानको सतहसमेत नमिलेको, ड्रेनेज पनि ठिक नभएको एएफसीले आरोप लगाउँदै आधिकारिक खेल आयोजना हुने नदिएको हो। योसँगै नेपालले न्युट्रल भेन्यू खोज्नुपर्ने भएको छ।
यता, एएफसीले मलेसिया र भियतनामको खेल आयोजना गर्न नदिएपछि यही मैदानमा अन्तर्राष्ट्रिय मैत्रीपूर्ण खेल हुँदै छ। भदौ अन्तिम साता नै नेपालले बंगलादेशसँग दुई खेल खेल्दै छ।
