बाँझो जमिन भाडामा लिएर धर्मराजले फलाए पहिलो वर्ष नै चार हजार केजी आलु

दिक्तेल रुपाकोट मझुवागढी नगरपालिका–३, बाम्राङका युवा कृषक धर्मराज राईले बाँझो जमिन भाडामा लिएर यस वर्ष चार हजार केजी आलु फलाएका छन् । सोही नगरपालिकाको वडा नम्बर २ मुडेका दोर्जी शेर्पाको कुनाखर्कमा रहेको २५ रोपनी बाँझो जमिन दश वर्षका लागि भाडामा लिएर व्यावसायिक आलुखेती गरेका धर्मराजले पहिलो वर्ष नै चार हजार केजी फलाएका हुन् ।  

१२ वर्षअघिदेखि जिल्लामै अर्गानिक तरकारी तथा फलफूल खेती गर्दै आएका धर्मराजले उत्पादन गरेको आलु प्रतिकेजी ४५ रुपैयाँमा बिक्रीसमेत गर्दै आएका छन् । वर्ष दिनअघि जग्गाधनी शेर्पासँग २५ रोपनी जग्गा भाडामा लिएर व्यावसायिक आलुखेती सुरु गरेका धर्मराजले तीन युवालाई रोजगारीसमेत दिएका छन् ।  

घरेलु तथा साना उद्योग कार्यालय खोटाङमा ‘झिसेपु अर्गानिक कृषि फार्म’ दर्ता गरेर व्यावसायिक कृषि पेसामा लागेका धर्मराजले उत्पादन गरेका आलुमध्ये एक हजार केजी बिउको लागि राखेर बाँकी बिक्री गरिरहेका छन् । उत्पादित आलुमध्ये करिब दुई हजार ८०० केजी शनिबार दिक्तेल बजारमा सञ्चालित होटेल तथा पसलहरूमा लगेर बिक्री गरेको धर्मराजले जानकारी दिए । 

३०-४० वर्षदेखि बाँझो रहेको जमिन खनजोत गरेर व्यावसायिक खेती सुरु गरेका धर्मराजले गत माघमा ६०० केजी भोटाङे जातको आलुको बिउ खरिद गरेर रोपेका थिए । कुनाखर्कमा उत्पादित अर्गानिक आलुलाई खोटाङको ब्रान्ड बनाउने उद्देश्यले व्यावसायिक आलुखेती गरेको धर्मराजले बताएका छन् ।  

करिब ११ लाख लगानीमा सुरु गरेको आलुखेतीलाई आगामी वर्षबाट थप विस्तार गर्दै लैजाने तयारीमा रहेको धर्मराजले बताए । ‘पहिलोपटक लगाएको आलुले राम्रो उत्पादन दिएको छ । यसलाई थप विस्तार गर्दै ब्राण्डिङ गर्ने योजनामा छु,’ उनले भने, ‘आलुसँगै पशुपालन तथा तरकारी खेतीसमेत गर्ने योजना छ । यसका लागि थप जनशक्तिसमेत खोजी गरिरहेको छु ।’

अर्गानिक कृषि उपज उत्पादन अभियानमा लागेका धर्मराजले सुरुमा वडा नम्बर ३ बाम्राङस्थित झिसेपुमा व्यवसायिकरुपमा अर्गानिक फलफूल तथा तरकारी खेती गरेका थिए । करिब १५ वर्षदेखि कृषि पेसामा आवद्ध धर्मराजले झिसेपुस्थित आफ्नै जग्गामा किबी, अलैँची, बेसार र अम्रिसोको व्यावसायिक खेती गर्दै आएका छन् । 

कृषि पेसालाई आधुनिक तथा यान्त्रीकरण गर्दै व्यावसायिक बनाउने अभियानमा लागेका धर्मराजले जिल्लाका अन्य कृषकलाई तालिमसमेत दिँदै आएका छन् । झिसेपुको फार्म सञ्चालनका लागि धर्मराजलाई श्रीमती र छोराछोरीले साथ दिने गरेका छन् ।