- वि.सं २o८२ असार २१ शनिबार
दाङ–सुर्खेत सडक खण्डअन्तर्गत दाङ तुलसीपुरको पातुखोला पुल जीर्ण हुन थालेपछि श्रमदान गरेर तटबन्ध निर्माण गरिएको छ। शनिबार माओवादी केन्द्र तुलसीपुरले श्रमदान गरेर तटबन्ध निर्माण गरेको हो । जहाँ तटबन्ध नहुँदा पुलमुनिको भाग गहिरिएर गएको छ ।
जसले गर्दा पुल जीर्ण अवस्थामा रहेपछि श्रमदान गरेर तटबन्धको काम गरिएको माओवादी केन्द्र तुलसीपुर नगर अध्यक्ष मोहन थापाले बताए । यो पुल पश्चिम दाङ जोड्ने महत्त्वपूर्ण पुल हो, तर बर्सेनि यहाँको भाग कटान हुँदै गएको छ, उनले भने यसरी कटान हुँदा पुल जीर्ण बन्दै गएको छ ।
जलस्रोत तथा सिँचाइ डिजिजन कार्यालय तुलसीपुरले ७ वटा जाली दिएपछि श्रमदान गरेर तटबन्ध निर्माण गरिएको हो। तटबन्ध निर्माणका लागि पार्टीका सबै तहका नेता तथा कार्यकर्ताहरूको सहभागिता रहेको थियो। बिहान ८ बजेदेखि दिउँसो १ बजेसम्म श्रमदान गरिएको हो। हरेक सामाजिक कार्यमा माओवादीले सहभागिता जनाउने भन्दै यस्ता कार्यलाई निरन्तरता दिने उनले बताए ।
पछिल्लो समय पातुखोला पुल जीर्ण बन्दै गएको छ । त्यो पुल संरक्षणका लागि पहल थाल्न स्थानीयले दबाब दिने गरेका छन् । पटक–पटक सम्बन्धित निकायलाई झकझक्याए पनि यो पुलका बारेमा चासो नदिएको तुलसीपुर उपमहानगरपालिका ९ का वडाध्यक्ष घनश्याम ढकालले बताए।
