- वि.सं Invalid date format
दिक्तेल बजारमा स्थापना गरिएको ‘मुन्दुम अन्तर्राष्ट्रिय कला संग्रहालय’का लागि आवश्यक भवन निर्माण गर्न नेपाल सरकार, संस्कृति, पर्यटन तथा नागरिक उड्डयन मन्त्रालयले रु. तीन करोड बजेट विनियोजन गरेको छ।
०८० मा दिक्तेल बजारमा आयोजना गरिएको ‘मुन्दुम अन्तर्राष्ट्रिय चित्रकला कार्यशाला तथा प्रदर्शनी– २०८०’ का क्रममा बनाइएका क्यानभास चित्र राखेर दिक्तेलमा स्थापना गरिएको मुन्दुम अन्तर्राष्ट्रिय कला संग्रहालयका लागि आवश्यक भवन निर्माण गर्न पर्यटन मन्त्रालयले बजेट उपलब्ध गराउने भएको हो।
दिक्तेल रुपाकोट मझुवागढी नगरपालिकाले ०८० असोज १७ गतेदेखि असोज २० गतेसम्म मुन्दुम अन्तर्राष्ट्रिय चित्रकला कार्यशाला तथा प्रदर्शनी आयोजना गरेको थियो । विभिन्न पर्यटकीयस्थलमा लगेर आयोजना गरिएको प्रत्यक्ष चित्रकला कार्यशाला तथा प्रदर्शनीमा सहभागी ५० देशका ख्यातिप्राप्त चित्रकारले बनाएका तथा अन्य चित्रकारले तयार पारेका १८२ वटा क्यानभास चित्रलाई समावेश गरेर नगरपालिकाले दिक्तेलमा मुन्दुम अन्तर्राष्ट्रिय कला संग्रहालय स्थापना गरिएको हो ।
पर्यटन मन्त्रालयले मुन्दुम कला संग्रहालयका लागि भवन निर्माण गर्न आवश्यक बजेट उपलब्ध गराएलगत्तै नास्टका पूर्वउपकुलपति प्रा.डा. जीवराज पोखरेलले डिजाइनको काम सुरु गरेको जनाइएको छ । मन्त्रालयले आगामी आर्थिक वर्षका लागि विनियोजन गरेको बजेटबाट निर्माण गरिने मुन्दुम अन्तर्राष्ट्रिय कला संग्रहालय भवनमा अधिकतम बाँसका सामग्री प्रयोग गर्ने गरी डिजाइनको काम सुरु गरिएको नगरपालिकाका उपप्रमुख विशन राईले जानकारी दिए ।
नेपालसहित अस्ट्रेलिया, बंगलादेश, भुटान, चीन, जापान, इजिप्ट, भारत, लात्भिया, लिथुआनिया, दक्षिण कोरिया, अमेरिका, युक्रेन र भियतनामलगायतका ख्यातिप्राप्त चित्रकारले क्यानभासमा उतारेका चित्रलाई संकलन गरेर दिक्तेल बजारमा मुन्दुम अन्तर्राष्ट्रिय कला संग्रहालय स्थापना गरिएको छ ।
जिल्लाको प्रमुख व्यापारिक केन्द्र दिक्तेल बजारस्थित रत्नपार्कमा सञ्चालित सपिङ कम्प्लेक्सको पाँचवटा कोठामा क्यानभास चित्रहरू राखेर स्थापना गरिएको मुन्दुम अन्तर्राष्ट्रिय कला संग्रहालय नेपाल सरकारका संस्कृति, पर्यटन तथा नागरिक उड्डयनमन्त्री बद्रीप्रसाद पाण्डेले गत पुस २९ गते औपचारिक रूपमा उद्घाटन गरेका थिए ।
संग्रहालय उद्घाटन कार्यक्रमलाई सम्बोधन गर्दै मन्त्री पाण्डेले कला, साहित्य र मौलिक संस्कार-कृति संरक्षण तथा पर्यटन प्रवर्द्धनमा नगरपालिकाले सुरुवात गरेको काम प्रशंसनीय भएको प्रतिक्रिया दिएका थिए । मुन्दुम अन्तर्राष्ट्रिय कला संग्रहालय उद्घाटन गरिएलगत्तै सर्वसाधारणका लागि विना शुल्क अवलोनमा खुला गरिएको छ। संसारभर छरिएर रहेका खोटांगे मनलाई एउटै थलोमा जोड्ने र चित्रकलाका माध्यमबाट खोटाङ र सिंगाे नेपाललाई विश्वमाझ परिचय गराउँदै पर्यटन प्रवर्द्धन र आर्थिक समृद्धिमा जोड्ने लक्ष्यका साथ ‘मुन्दुम अन्तर्राष्ट्रिय कला संग्राहलय’ स्थापना गरिएको नगर प्रमुख तीर्थराज भट्टराईले बताए ।
‘संसारभर छरिएर रहेका खोटांगे मनलाई एउटै थलोमा जोड्ने काम गरेको छ । चित्रकलाको माध्यमबाट खोटाङ र सिंगाे नेपाललाई विश्वमाझ परिचित गराउन सफल भएका छौँ,’ उनले भने, ‘मुन्दुम अन्तर्राष्ट्रिय कला संग्रहालयले पर्यटन प्रवर्द्धन र आर्थिक समृद्धिमा टेवा पुग्ने अपेक्षा गरेका छौँ । यसलाई थप प्रवर्द्धन गर्न सबैको सहयोग आवश्यक छ ।’
मुन्दुम चित्रकला कार्यशाला तथा प्रदर्शनीमा सहभागी विश्वमा ख्यातिप्राप्त चित्रकारले बनाएका तथा अन्य चित्रकारहरूले तयार पारेका क्यानभास चित्रलाई समावेश गरेर नगरपालिकाले वि ०८० फागुन ५ गतेदेखि १७ गतेसम्म नेपाल कला परिषद्, बबरमहल, काठमाडौंमा मुन्दुम अन्तर्राष्ट्रिय चित्रकला प्रदर्शनी आयोजना गरेको थियो । राष्ट्रपति रामचन्द्र पौडेलले औपचारिक उद्घाटन गरेको चित्रकला प्रदर्शनीमा देशका उच्चपदस्थ व्यक्तिहरूले प्रत्यक्ष अवलोकन गरेका थिए ।
धनु आर्ट स्टुडियो काठमाडौंसँगको सहकार्यमा १३ दिनसम्म आयोजना गरिएको चित्रकला प्रदर्शनीको औपचारिक समापन तत्कालीन प्रधानमन्त्री एवं नेपाल कम्युनिस्ट पार्टी (माओवादी केन्द्र) का अध्यक्ष पुष्पकमल दाहाल ‘प्रचण्ड’ ले गरेका थिए । अमेरिकाकी चित्रकार एवं प्रोफेसर जोय बल्फ, लात्भियाकी चित्रकार आन्दा पैकाने, नेपाली चित्रकारहरू रतनकुमार राई, विजय थापालगायत ५० देशका ख्यातिप्राप्त चित्रकारहरूलाई खोटाङमै बोलाएर जिल्लाका दशवटै स्थानीय तहका धार्मिक, ऐतिहासिक एवं पर्यटकीय स्थलहरू तथा धर्म, संस्कार, संस्कृति, परम्परा र स्थानीय रहनसहनलाई क्यानभासमा उतार्न लगाइएको हो । रासस
