राष्ट्रिय महिला गोल्डकप : उपाधिका लागि दुई विभागीय टोली भिड्ने

मकवानपुरमा जारी सहिद स्मृति स्थानीय तह राष्ट्रिय महिला गोल्डकप फुटबलको उपाधिका लागि दुई विभागीय टोली (नेपाल पुलिस क्लब र सशस्त्र प्रहरीको एपिएफ) भिड्ने भएका छन्।

हेटौँडा–६ स्थित गौरीटार रंगशालाको फुटबल मैदानमा मंगलबार भएको दोस्रो सेमिफाइनलमा संकटालाई हराउँदै पुलिससँगको उपाधि भिडन्त पक्का गरेको हो। एपिएफले संकटालाई अति प्रतिस्पर्धात्मक खेलमा २–० गोल अन्तरले निराश बनायो। यसअघि मंगलबार नै भएको पहिलो सेमिफाइनल खेलमा पुलिसले चितवनलाई ७–० गोलको पराकिलो अन्तरले हराउँदै फाइनलमा स्थान बनाएको थियो।

एपिएफ र संकटाबिचको खेलको पहिलो हाफ गोलरहित बराबरीमा सकिएकोमा दुवै गोल दोस्रो हाफको अन्तिम अन्तिममा सम्भव भएको थियो। एपिएफको जितमा रश्मि घिसिङले खेलको ७१औँ र अनिता केसीले ७६औँ मिनेटमा गोल गरे। रश्मिले कप्तान अनिता बस्नेतको कर्नर प्रहारलाई हेडमार्फत गोल गर्दा अनिताले केसीले पनि बस्नेतकै असिस्टमा गोल गरेकी हुन्। खेलमा उत्कृष्ट प्रदर्शन गरेकी एपिएफकी रेनुका नगरकोटी प्लेयर अफ द म्याच घोषित भइन्। उनले नगद १० हजार रुपैयाँसहित ट्रफी प्राप्त गरिन्।

यसअघि मंगलबार नै भएको पहिलो सेमिफाइनमा जित निकाल्दै पुलिसले उपाधिनजिक पुग्दा चितवनलाई ७–० गोल अन्तरले हराएको थियो। पुलिसको जितमा मीना देउवा र निर्मा उपाध्यायले ह्याट्रिक गरे। देउवाले खेलको २१औँ, ४०औँ र ५९औँ मिनेटमा ह्याट्रिक पूरा गर्दा, उपाध्यायले ३४औँ, ६६औँ र ८०औँ मिनेटमा गोल गर्दै ह्याट्रिक पूरा गरिन्। 

पुलिसको लागि थप एक गोल खेलको ४५औँ मिनेटमा सुष्मा तामाङले गरिन्। देउवा प्लेयर अफ द म्याच घोषित भइन्। उनले नगद १० हजार रुपैयाँसहित ट्रफी प्राप्त गरिन्। 

मकवानपुर जिल्ला फुटबल संघको आयोजनामा जारी प्रतियोगिताको फाइनल खेल बिहीबार दिउँसो ३ बजे हुनेछ। आठ टिमको सहभागिता रहेको प्रतियोगितामाको विजेताले पाँच लाख र उपविजेताले तीन लाख नगदसहित ट्रफी र प्रमाणपत्र पाउनेछन् भने सर्वोत्कृष्ट खेलाडीले स्कुटर प्राप्त गर्नेछन्। यस्तै, विधागत उत्कृष्टलाई समेत नगदसहित ट्रफीको व्यवस्था गरिएको छ। हरेक खेलको म्यान अफ द म्याचले नगद १० हजार रुपैयाँ प्राप्त गर्नेछन्।