शान्तिसुरक्षा र राजस्व चुहावटमा सुरक्षा निकायको सहकार्य गर्नुस् : गृहमन्त्री लेखक

गृहमन्त्री रमेश लेखकले भारतसँग जोडिएको सीमानाका आसपासको क्षेत्रमा हुने विभिन्न आपराधिक गतिविधिका साथै भन्सार छलेर हुने अवैध चोरी तस्करी न्यूनीकरण गर्ने गरी काम गर्ने निर्देशन दिएका छन्। उनले जिल्लाको शान्तिसुरक्षा र राजस्व चुहावट नियन्त्रणका सबै सुरक्षा अधिकारका निकायबिच सहकार्य गरेर अगाडि बढ्न निर्देशन दिए। 

जिल्ला प्रशासन कार्यालय पर्सामा आयोजित राजस्व चुहावट नियन्त्रण समन्वय समितिको बैठकलाई सम्बोधन गर्दै तीनवटै सुरक्षा संयन्त्रलाई यस्तो बताएका हुन्। यस्तै, वीरगन्ज भन्सार कार्यालयले गएको आर्थिक वर्षको तुलनामा चालू आर्थिक वर्षमा मासिक लक्ष्यअनुसार राजस्व संकलन गरिरहेको वीरगन्ज भन्सार कार्यालयका प्रमुख भन्सार प्रशासक विष्णुप्रसाद ज्ञवालीले बताए। 

सीमाआसपासको क्षेत्रबाट गाडी लोड भएर गइरहेकाले सुरक्षा निकायले बिलबिजकविना तस्करीका मालवस्तु ओसार्ने प्रवृत्तिलाई रोक्न आवश्यक रहेको पथलैयास्थित राजस्व अनुसन्धान कार्यालयका प्रमुख हरिप्रसाद शर्माले बताए। 
नेपाल प्रहरी मधेश प्रदेश प्रहरी प्रमुख डिआइजी उमाप्रसाद चतुर्वेदीले मधेशको जिल्लामा सीमानाकानजिकको भन्सार क्षेत्रमा गोदाम खोल्ने प्रवृत्तिलाई निरुत्साहित गर्न आवश्यक रहेको बताए। 

प्रमुख जिल्ला अधिकारी तोयनारायण सुवेदीले जिल्लाको शान्तिसुरक्षा र राजस्व चुहावट नियन्त्रणका लागि आफूसम्बद्ध सरोकारवाला निकायसँग समन्वय गरी अघि बढ्ने प्रतिबद्धता व्यक्त गरे।