नेपथ्यकाे युरोप यात्रा : माल्टाको हलमा भरिभराउ दर्शक

करिब १० हजार नेपाली बस्दै आएका माल्टामा नेपाली सांगीतिक ब्यान्ड नेपथ्यको प्रस्तुतिमा नेपाली दर्शकले भरिभराउ भएको छ। अफ्रिका र युरोपबिचको भूमध्य सागरमा थोप्लाजस्तो अनकन्टार टापु देश माल्टाको जनसंख्या पाँच लाखभन्दा केही बढी छ। ‘कन्सर्टको घोषणा गरिसक्दा पनि यहाँका मानिसले नेपथ्य आउला भनेर पत्याइरहेका थिएनन्,’ आयोजक टोलीका आकाश गुरुङले भने। ‘तर बुधबार २५ सयभन्दा बढी दर्शक हलभरि नाचिरहे।’

नेपालीमाझ कमै चिनिएको यो सानो मुलुकमा पहिलोपटक पाइला राखेको नेपथ्यले उपस्थित हुनासाथ आर्जन गरेको चर्चालाई उसको भव्य प्रस्तुतिले अझ बुलन्द बनाएको छ।

कन्सर्टका लागि डेढ घण्टाअगावै अर्थात् बेलुकीको ठिक साढे ६ बजे ‘माल्टा फेयर एन्ड कन्भेन्सन सेन्टर’का ढोका खुला गरिएका थिए । लगत्तै हलको एकातिर घडीका अंकहरू दगुर्दै गरेको देखिन्थ्यो भने अर्कातिर लगातार भरिँदै गरेका दर्शकको चहलपहल ।

हलभित्र भरिएका दर्शक र उनीहरूबिचको ऊर्जाले पहिलो गीत ‘कोशीको पानी’ देखि नै जताततै नृत्यरत शरीर देखिन सुरु भएको थियो ,जुन कार्यक्रमसँगै झन् बढ्दै गयो।

सानो भए पनि रणनीतिक महत्त्वको यस मुलुकमा दोस्रो विश्वयुद्धताका बेलायती साम्राज्यअन्तर्गतको गोर्खाली सेना आएको अभिलेख पाइन्छ। ‘अवसरको बाध्यताले हाम्रा पुर्खाले उतिवेलै यहाँसम्म आएर आफ्नो रगत र पसिना बगाएका थिए,’ गायनकै क्रममा अमृत गुरुङले भने, ‘आउनुस्, उनीहरूकै सम्झनामा एउटा गीत गाऔँ।’ त्यसपछि लाहुरे परम्पराबाटै विकास भएको गीत ‘नैनाताल’ सुनाउँदै गर्दा दर्शक भावुक बनेका थिए।

‘अवसरको खोजीमा भौँतारिने नेपाली परम्पराले आज तपाईंहरूलाई यहाँसम्म ल्याएको छ,’ अमृतले थपे, ‘इमानदारीसाथ काम गर्नुस् र यहाँको संस्कृतिको पनि सम्मान गर्नुस् । तपाईंले सम्मान गरे उसले पनि तपाईंको सम्मान गर्छ।’

पहिलोपटक कन्सर्ट भइरहे पनि यहाँका दर्शक नेपथ्यका सिर्जनाबाट उत्तिकै परिचित देखिन्थे। 
कन्सर्टमा अमृतलाई ड्रमसेटमा ध्रुव लामा, बेस गितारमा सुविन शाक्य, गितारमा नीरज गुरुङ, मादलमा शान्ति रायमाझी र किबोर्डमा दिनेशराज रेग्मीले सघाएका थिए।