दाताको सहयोगमै उभियो बागलुङकाे मालढुंगा खुदुर्केमा राधाकृष्ण मन्दिर

बागलुङ प्रवेशद्धारको रुपमा रहेको मालढुंगामा बृहत इस्कोन गण्डकी परियोजनाले नयाँ धार्मिक पर्यटकीय गन्तव्यको विकास गरेको छ । बागलुङ नगरपालिका–१ को मालढुंगा खुदुर्केमा अन्तर्राष्ट्रिय कृष्णभावनामृत संघ ‘इस्कोन गण्डकी’ परियोजनाअन्तर्गत कलात्मक राधाकृष्ण मन्दिर निर्माण भएको छ । उक्त मन्दिर दाताको सहयोगमा नै उभिएको हो । 

मन्दिरको सुभारम्भ श्रीकृष्ण जन्माष्टमीको अवसरमा प्रभु पत्रिदास र महाविष्णु महाराजबाट गरिएको इस्कोन बागलुङका संस्थापक अध्यक्ष परमेश्वर अच्युतदासले जानकारी दिए । 

इस्कोनका सदस्य तथा मुठीदान गर्ने भक्तजनबाट संकलित रकम दुई करोड ५० लाखबाट सभाहलसहितको राधाकृष्ण मन्दिर निर्माण भएको छ । मुठीदानकै भरमा सयौं वर्ष पुरानो यहाँको लक्ष्मीनारायण मन्दिर पनि जीर्णोद्धार भएको छ ।

लक्ष्मीनारायण गुठीको १७ रोपनी जमिनमा इस्कोन गण्डकी परियोजना सञ्चालनमा छ । तीन वर्षअघि निर्माण भएको डिपिआरअनुसार यहाँ ४३ करोडका संरचना बन्ने अध्यक्ष अच्युतदासले जानकारी दिए । मन्दिर परिसरमा सभाहल, मन्दिर, साकाहारी भोजनालय, धर्मशाला र अतिथिगृह बनाइने छ । त्यसबाहेक कालीगण्डकी किनारमा स्नानस्थल, आरतीको विशेष मञ्च र ध्यान स्थलसमेत बनाइनेछ ।

मन्दिर नजिकै रहेको कालीगण्डकी किनारमा स्नान र ध्यानस्थल बनाउन सुरु भइसकेको छ, जसले विशेषगरी विदेशी धार्मिक पर्यटकलाई आर्कषण गर्ने विश्वास छ ।  

यस परियोजनामा गण्डकी प्रदेश सरकारको सहयोगमा सिंचाइ तथा जलस्रोत विकास डिभिजन कार्यालयमार्फत कालीगण्डकी नदी व्यवस्थापनका लागि संरक्षण पर्खाल निर्माण गरिएको छ । ‘पर्खालले परियोजनाको जमिन र संरचनाको सुरक्षा सहज बनाएको अध्यक्ष अच्युतदासले बताए ।

मन्दिर निर्माणसँगै मुक्तिनाथ र बागलुङ कालिका आउने धार्मिक पर्यटकका लागि नयाँ गन्तव्य बनेको बागलुङ नगरपालिकाका नगरप्रमुख बसन्तकुमार श्रेष्ठ बताउँछन् । बागलुङ कालिका र पञ्चकोट आउने पर्यटकलाई पहिलो स्वागतद्धारको रुपमा यस मन्दिर रहने श्रेष्ठको भनाइ छ ।