- वि.सं २o८२ असार १९ बिहीबार
लुम्बिनी प्रदेश सरकारको आर्थिक वर्ष ०८२/८३ को बजेट बहुमतले पारित भएको छ । बुधबार बसेको प्रदेश सभाको बैठकले आगामी आवको ३८ अर्ब ९१ करोड रुपैयाँको बजेट पारित गरेको हो ।
सोही बैठकमा आर्थिक मामिला तथा योजनामन्त्री धनेन्द्र कार्कीले प्रदेश सरकारको अर्थसम्बन्धी प्रस्तावलाई कार्यान्वयन गर्न बनेको विधेयक पारित गरियोस् भन्ने प्रस्ताव प्रस्तुत गरेका थिए ।
सभामुख तुलाराम घर्ती मगरले निर्णयार्थ प्रस्तुत गरेपछि उक्त प्रस्ताव बहुमतले पारित भएको घोषणा गरेका थिए । पारित बजेटमध्ये चालूतर्फ १२ अर्ब एक करोड ४७ लाख र पुँजीगततर्फ २३ अर्ब हजार अर्थात् ८ दशमलव ८) प्रतिशत विनियोजन गरिएको छ ।
त्यसैगरी, सुदूरपश्चिम प्रदेश सरकारको आगामी आर्थिक वर्ष ०८२/८३ को बजेट प्रदेश सभाबाट पारित भएको छ । बजेटमाथिको छलफल सकिएपछि सभामुख भीमबहादुर भण्डारीले बजेटलाई निर्णयार्थ प्रस्तुत गर्दा सत्तापक्षका सांसदले समर्थन जनाए भने प्रतिपक्षी मौन बसेका थिए ।
तीन दिनसम्म चलेको बजेटमाथिको छलफलमा प्रतिपक्षीभन्दा सत्तापक्षका सांसद आक्रामक देखिएका थिए । बजेटमा बिचौलिया हाबी भएका र आर्थिक लेनदेनका आधारमा योजना राखिएका भन्दै सत्ता र प्रतिपक्षीका सांसदले संसदीय छानबिन समितिनै गठन गर्न माग गरेका थिए ।
बुधबारको छलफलमा भाग लिँदै सत्तारूढ एमालेका सांसद धर्मराज पाठकले बजेटका नाममा कमाउधन्दा चलिरहेको आरोप लगाए ।
