राष्ट्रिय सभामा सांसदहरूले भने, ‘आगामी आवको बजेट सन्तुलित र यथार्थपरक छ’ 

राष्ट्रिय सभाको आजको बैठकमा सांसदहरूले आगामी आर्थिक वर्ष ०८२/८३ को बजेट सन्तुलित र यथार्थपरक आएको प्रतिक्रिया दिएका छन् । 

आर्थिक वर्ष ०८२/८३ को राजस्व र व्ययको वार्षिक अनुमानमाथिको सामान्य छलफलमा दलीय आधारमा धारणा राख्दै नेपाल कम्युनिस्ट पार्टी (एकीकृत समाजवादी)की सांसद मदनकुमारी शाह (गरिमा)ले आगामी आवको बजेटले विगतका बजेटमा भएका कमीकमजोरी स्वीकार गरेर आएको टिप्पणी गरिन् । 

उनले भनिन्, ‘कमीकमजोरी स्वीकार गरेपछि तिनको समाधान हुने गरी बजेट आउनुपर्नेमा त्यसरी भने आएको छैन । संविधानको मूल मर्म र भावनाअनुरूप आर्थिक, सामाजिक रूपान्तरण कार्यक्रममार्फत समाजवादी दिशामा अगाडि बढाउने नीतिका साथ बजेट आउनुपर्ने थियो ।’ परनिर्भर आर्थिक व्यवस्थामा परिवर्तन गर्न सकिएन भने र देश चलाउन आन्तरिक ऋण वृद्धि भइरहने भन्दै यसले मुलुकको अर्थव्यवस्था संकटमा पर्ने उनको भनाइ छ ।

जनता समाजवादी पार्टी (जसपा) नेपालकी सांसद पूजा चौधरीले विगतका सरकारले ल्याएको आर्थिक वर्षको बजेट ठुलो आकारमा हुने, तर कार्यान्वयनको कमजोरीका कारण खर्च नहुने गरेको उल्लेख गर्दै बजेट कार्यान्वयनमा जोड दिनुपर्ने आवश्यकता औँल्याइन्। उनले भनिन्, ‘विश्व अर्थतन्त्र कमजोर भएको वर्तमान अवस्थामा बाहिरी स्रोतमा भर पर्नुभन्दा अधिकतम उपलब्धि प्राप्त हुने गरी आन्तरिक स्रोतसाधन परिचालन गर्न सरकारसमक्ष निवेदन गर्दछु ।’ 

लोकतान्त्रिक समाजवादी पार्टी (लोसपा)नेपालका सांसद शेखरकुमार सिंहले आगामी आव ०८२/८३ को बजेट स्वागतयोग्य रहेको टिप्पणी गरे । ‘यो बजेट महत्त्वाकांक्षी नभई यथार्थमा आधारित छ, बजेटले कृषि आधुनिकीकरण, भूमि व्यवस्था, उद्योग तथा व्यापार, पर्यटन पूर्वाधार, वन तथा वातावरण, श्रम तथा रोजगारलगायत पक्षलाई समावेश गर्दै निरोगी नेपाल र स्वास्थ्य नेपालीलाई प्राथमिकता दिएको छ ।’ 

सरकारले यही जेठ १५ गते रु. १९ खर्ब, ६४ अर्ब ११ करोडको आगामी आर्थिक वर्ष ०८२/८३ को राजस्व र व्ययको वार्षिक प्रस्तुत गरेको थियो ।