Skip This
चन्द्रागिरि नगरपालिका– ४ स्थित थानकोटमा २५ शय्याको प्रसूति तथा स्त्रीरोग अस्पताल बनाउन प्रारम्भिक खाका स्वीकृत भएको छ। जर्मन सरकारको आर्थिक एवं प्राविधिक सहयोगमा थापाथलीस्थित परोपकार प्रसूति तथा स्त्रीरोग अस्पतालको ‘स्याटेलाइट’ अस्पतालका रूपमा सो स्थानमा नयाँ अस्पताल बन्न लागेको हो।
यसका लागि जर्मन विकास बैंक ( केएफडब्लू) ले प्रारम्भिक खाका स्वीकृत गर्दै विस्तृत खाकाको तयारी थालेको जानकारी नेपाल सरकार, स्वास्थ्य तथा जनसंख्या मन्त्रालय र चन्द्रागिरि नगरपालिकालाई जानकारी गराएको छ।
यो खाकाको तयारीसँगै अब भवन बनाउन बोलपत्रको बाटो खुला भएको छ भने छिट्टै बोलपत्र आह्वान हुने जनाइएको छ। विस्तृत खाका तयार गर्नका लागि स्थलगत अध्ययन गर्न केएफडब्लूको केन्द्रीय कार्यालय जर्मनको बर्लिनबाट उच्चस्तरीय टोलीले बुधबार अस्पताल बन्न लागेको स्थानको अवलोकन एवं चन्द्रागिरि नगरपालिकाका प्रमुखसहित अन्य जननिर्वाचित प्रतिनिधि, प्रमुख प्रशासकीय अधिकृत, जनस्वास्थ्य शाखा एवं अन्य उच्च प्राविधिक कर्मचारीसँग छलफलसमेत गरेको छ।
छलफलमा चन्द्रागिरि नगरपालिकाका प्रमुख घनश्याम गिरीले अस्पताल बनाउन नगरपालिकाले आवश्यक सहजीकरण गर्दै आएको र आगामी दिनमा सहजीकरण जारी राख्ने जानकारी सो उच्चस्तरीय टोलीलाई दिए। उनले नेपाल सरकार, स्वास्थ्य तथा जनसंख्या मन्त्रालय, नगरपालिका र केएफडब्लूबिचका अस्पतालका विषयमा भूमिका स्पष्ट पारिसकिएको बताए।
उनले भने, ‘केएफडब्लूले अस्पतालको प्रारम्भिक खाका स्वीकृत गरेकामा धन्यवाद दिन चाहन्छु। अब म अस्पतालको विस्तृत खाका तयार गर्न र बोलपत्र आह्वान गरेर थप काम सुरु गर्न आग्रह गर्दछु।’ केएफडब्लू टोलीका मिसेल स्विपर, प्राडा योर्क ह्युकेल्बक, रेबिक्का ट्रेइगर, निकोल आना पास्कल जिनेन र स्टुआर्ट किङले छलफलका क्रममा राखेका जिज्ञासालाई नगर प्रमुख गिरीले जवाफ दिँदै विशेषज्ञ अस्पताल बनाउन स्थानीय सरकारले आवश्यक सबै समन्वय गर्ने गर्ने प्रतिबद्धता व्यक्त गरे।
छलफलमा नगर उपप्रमुख वसन्ती श्रेष्ठ, प्रमुख प्रशासकीय अधिकृत सुरेन्द्र थापामगर, नगरप्रवक्ता एवं चन्द्रागिरि– ४ का वडाध्यक्ष कृष्णप्रसाद खड्गी, सामाजिक विकास समितिका संयोजक एवं चन्द्रागिरि– १५ का वडाध्यक्ष घनश्याम लुइँटेल, चन्द्रागिरि– ११ का वडाध्यक्ष नरेन्द्रराज श्रेष्ठ, चन्द्रागिरि– ५ का वडाध्यक्ष राजेन्द्र महर्जनलगायत कार्यपालिका सदस्य एवं उच्चतहका कर्मचारीको उपस्थिति थियो।
पश्चिमी भेगको स्वास्थ्य सेवामा नयाँ आयाम
केएफडब्लूले सो अस्पतालका लागि रु. एक अर्बबराबरको आर्थिक एवं प्राविधिक सहयोग गर्ने जनाइएको छ। अस्पताल बनाउन मन्त्रिपरिषद्ले २३ रोपनी जग्गा नगरपालिकालाई स्वीकृत गरेको थियो। नगरपालिकाको समन्वय र सहकार्यमा नेपाल सरकार र केएफडब्लूले विस्तृत आयोजना प्रतिवेदन (डिपिआर) तयार पारेका थिए।
नगरप्रमुख गिरीले भने, ‘निर्धारित समयभित्र अस्पताल बनाउन नगरपालिकाले आवश्यक सहयोग र समन्वय गर्छ। यस क्षेत्रमा जनशक्ति, उपकरण र पूर्वाधारमा अस्पताललाई उत्कृष्ट बनाउँछौँ। नगरवासीले चाहेको गुणस्तरीय सर्वसुलभ स्वास्थ्य सेवा सहज रूपमा उपलब्ध गराउन नगरपालिका प्रतिबद्ध छ। विशेषज्ञ अस्पताल बनेपछि यस क्षेत्रको स्वास्थ्य सेवामा नयाँ आयाम थपिनेछ।’
विशेषज्ञ अस्पतालले काठमाडौं जिल्लाका दक्षिण–पश्चिम भेगका थानकोट, दहचोक, नैकाप, नयाँ भञ्ज्याङ, वाड भञ्ज्याङ, बलम्बु, महादेवस्थान, तीनथाना, सतुंगल, मातातीर्थ, मच्छेगाउँ र नैकाप पुरानो भञ्ज्याङका बासिन्दालाई विशेष सुविधा पुर्याउने लक्ष्य लिइएको छ। साथै धादिङ, मकवानपुर र नुवाकोट बासिन्दालाई पनि सहज विशेषज्ञ चिकित्सक सेवा पुर्याउने अपेक्षा गरिएको छ।
०७६ वैशाख २८ देखि चन्द्रागिरि– ४ थानकोटमा नै १५ शय्याकाे अस्पताल सञ्चालनमा आइसकेको छ। प्रयोगशाला, आकस्मिक सेवा र बर्थिङ सेन्टरसहितको उत्कृष्ट सेवा अस्पतालले प्रदान गरिराखेको छ। अस्पतालले पछिल्लो समय विशेषज्ञ मुटुरोग सेवा, परिवार नियोजन सेवा, ज्येष्ठ नागरिक, विपन्न तथा अपांगता भएकालाई निःशुल्क सेवा प्रदान गरिराखेको छ। रासस
