उपत्यकाव्यापी खुला मेयर कप : कीर्तिपुर नगरपालिकालाई ३–० ले पराजित गर्दै काठमाडौं महानगरपालिका फाइनलमा 

कीर्तिपुर नगरपालिकालाई ३–० ले पराजित गर्दै काठमाडौं महानगरपालिकाको फुटबल टिम ‘उपत्यकाव्यापी खुला मेयर कप फुटबल खेल’को फाइनलमा प्रवेश गरेको छ । गोदावरी नगरपालिकाको चापागाउँ, ताहाखेल खेलमैदानमा हिजो  भएको खेलमा महानगरपालिकाका लागि राजकुमार पौडेलले पहिलो गोल र त्यसपछि मनीष सेढाईंले लगातार दुई गोल गरेका थिए । महानगरपालिका ‘समूह बी’बाट र कीर्तिपुर ‘समूह डी’बाट सेमिफाइनल खेलमा पुगेका थिए ।  

सेमिफाइनलको अर्को खेल आज ‘समूह ए’ र ‘समूह सी’का विजेताहरू आयोजक गोदावरी नगरपालिका र काठमाडौंको दक्षिणकाली नगरपालिकाबिच हुनेछ । 
भोलि आयोजक गोदावरी र काठमाडौंको दक्षिणकाली नगरपालिकाबिचकाे खेल सेमिफाइनल खेल हुँदै छ । यस खेलका विजेता टिम र काठमाडौं महानगरपालिकाको टिमबिच आउँदो शुक्रबार फाइनल खेल हुने तालिका छ ।

 गोदावरी उपत्यकाव्यापी अन्तरपालिका खुला मेयर कप फुटबल २०८२ खेलअन्तर्गत महानगरपालिकाको पहिलो खेल चाँगुनारायण नगरपालिकासँग भएको थियो । यस खेलमा चाँगुनारायणलाई महानगरपालिकाले  ५–० गोलले पराजित गरेको थियो । यस खेलमा राजकुमार पौडेल, विराज महर्जन, अखिलेश कार्की, सरोज तामाङ र मनीष सेढाईंले महानगरपालिकाका लागि एक–एक गोल दिलाएका थिए। ‘समूह बी’मा रहेको महानगरपालिकाले दोस्रो खेल मध्यपुर थिमीसँग खेलेको थियो । यस खेलमा सरोज तामाङले एक गोल गरेका थिए । 

महानगरपालिकाबाट प्रशिक्षक सन्तोष न्यौपाने र पूर्वराष्ट्रिय खेलाडी विराज महर्जनको कप्तानीमा खेलाडीहरू  प्रतिस्पर्धामा उत्रिएका छन् । खेलाडीहरूको व्यवस्थापन खेलकुदविज्ञ नवीन चित्रकारले गरेका छन् । प्रतियोगितामा काठमाडौं जिल्लाबाट काठमाडौं महानगरपालिका, चन्द्रागिरी नगरपालिका, तारकेश्वर नगरपालिका, दक्षिणकाली नगरपालिका, कीर्तिपुर नगरपालिका, कागेश्वरी मनोहरा नगरपालिका गरी ६ वटा स्थानीय तह प्रतिस्पर्धामा छन्। यस्तै, ललितपुर जिल्लाबाट ललितपुर महानगरपालिका, आयोजक गोदावरी नगरपालिका, महालक्ष्मी नगरपालिका, कोन्ज्योसोम गाउँपालिका र बागमती गाउँपालिकासहित पाँचवटा स्थानीय तह छन् । भक्तपुर जिल्लाको चाँगुनारायण नगरपालिका, मध्यपुर थिमी नगरपालिकाले भाग लिएका छन् ।

प्रतियोगिताको विजेता टिमलाई नगद पाँच लाख रुपैयाँसहित ट्रफी, उपविजेता टिमलाई नगद तीन लाख रुपैयाँसहित ट्रफी प्रदान गरिनेछ ।