विश्वमा अशान्ति बढेको वेला बुद्धदर्शन र शिक्षाको उपादेयता बढ्यो : प्रधानमन्त्री ओली

प्रधानमन्त्री केपी ओलीले विश्वमा अशान्ति बढिरहेका वेला बुद्धदर्शन र शिक्षाको उपादेयता बढेको बताएका छन् ।

लुम्बिनीमा आज आयोजित २५६९औँ बुद्धजयन्ती एवं लुम्बिनी दिवस २०८२ मूल समारोहलाई सम्बोधन गर्दै उनले अहिले विश्वमा बढ्दै गएको द्वन्द्व र हिंसालाई हतियारले होइन, बुद्धदर्शनले मात्रै रोक्न सक्ने बताएका हुन् ।

‘हाम्रो छिमेकी देश भारत र पाकिस्तान पनि युद्धमा जान खोजेका थिए, तर सबैको दबाबमा तत्कालका लागि फिर्ता भएका छन्, अझै पनि केही समस्या छन्, अन्य मुलुकमा पनि यस्ता समस्या छन्, बुद्धभूमिबाट विश्वमा शान्तिको कामनाका लागि हामीले अनुरोध गरेका छौँ,’ उनले भने ।

विश्वमा जल, थल र वायुबाट समेत आक्रमण गर्न सक्ने खतरनाक हतियार निर्माण भइरहेको अवस्थामा त्यसलाई रोक्न बुद्धको शान्ति, करुणा र मानवताको उपदेशले मात्रै सम्भव हुने ओलीले बताए ।

बुद्धले आफ्नो निजी सुखसयल छाडेर मानव कल्याणका लागि दरबार छाडेको बताउँदै बुद्धको जीवनबाट मानव जातिले धेरै कुरा सिक्नुपर्ने उनको भनाइ थियो । बुद्ध शिक्षा र विचार, शान्ति करुणा र मैत्री भावलाई जीवित राख्न ठुलो संघर्ष भएको इतिहास सम्झाउँदै अब बुद्धको विचारअनुसारलाई विश्व शान्ति कायम गर्न आग्रह गर्दै उनले लुम्बिनी पवित्र भूमि मात्रै नभई बुद्ध दर्शनको उत्पत्तिको थलो भएको बताए ।

अग्रजहरूले बुद्धका शान्तिप्रिय विचार, शान्ति करुणा र मैत्रीय विचारहरूलाई जीवित राख्न ठुलो संघर्ष गरेको उनको भनाइ थियो । उनले अब गुरुयोजना छिटो पूरा गर्ने मुख्य उद्देश्य राखेको बताए । ‘गुरुयोजनामा ढिलाइ भएको छ, अब यसलाई छिटो पूरा गर्नु छ,’ उनले भने । ‘बुद्धका शान्ति सन्देशको महत्त्व हरेक व्यक्ति परिवार, समाज र देशका लागि जरुरी छ । विश्वका बढेको अशान्तिलाई पनि यहाँबाट सन्देश दिन जरुरी छ । मुख्य कुरा शान्तिको सन्देशलाई, मुख्य उपदेशहरू, आदर्शहरूलाई समाउन जरुरी छ,’ उनले भने ।

प्रधानमन्त्री ओलीले लुम्बिनी क्षेत्रको विकास, यो ठाउँको विकास, बुद्धका शिक्षा र उपदेशको खोज अनुसन्धानका लागि लुम्बिनी बौद्ध विश्वविद्यालय सुरुवात गरेकाले त्यसमै केन्द्रित हुन आग्रह गरे ।

‘हरेक कुरालाई दूरीले कमजोर बनाउँछ, त्यो घटाउनुपर्दछ । बुद्धको हरेक उपदेशको सन्देश यही छ,’ उनले भने । प्रधानमन्त्री ओलीले लुम्बिनी विकास कोषलाई यस्ता ठुला समारोहमा प्रमुख भाषालाई अनुवाद जरुरी रहेको बताउँदै विशेष ध्यानाकर्षण गराए ।

प्रधानमन्त्री ओलीले ०७३ सालमा बुद्धजयन्ती मनाउन आउँदा कार्यक्रम स्थल हावाहुरीले भत्काएपछि अहिलेको हल बनाएको स्मरण गरे ।

‘राष्ट्रपति विद्यादेवी भण्डारी तथा विदेशी पाहुनासमेत सहभागी उक्त कार्यक्रम बिथोलिएपछि सोही सभाबाट लुम्बिनीमा पाँच हजार क्षमताको अन्तर्राष्ट्रिय सभाहल निर्माण गर्ने घोषणा गरेको थिएँ । केही समयमा काम थालियो, केही समयमा म बाहिर परेँ, पछि आएर सुरु भएको हो, तर यो हल यस्तो इकोसिस्टम बनाउने चाहेको होइन, अब तत्काल पूर्ण बनाइनुपर्दछ । अर्को बुद्धजयन्तीको कार्यक्रम सुविधासम्पन्न हलमा गरिनेछ,’ उनले भने ।