बुद्ध
बुद्ध हुनुअघि
एउटा – छोरा
एउटा – बाबु
एउटा – पति
थिए ।
बुद्ध
बुद्ध भइसकेपछि
एउटा – छोरा
एउटा – बाबु
एउटा – पति
रहेनन् ।
यौटा ठुलो
वृक्षको फेदमुनि
ध्यान गरिबसेका
बुद्धको
एक दिन अचानक ध्यान भंग भयो ।
झस्किए बुद्ध
र सम्झिए छोराछोरी र पत्नी
सम्झिए परिवार आमा र बाउ ।
र बुद्ध फर्के घर ।
कष्टकर थियो बसको यात्रा
सडक अव्यवस्थित थिए
सडकको
माथिल्लो छेउ र तल्लो छेउ
गिट्टी कुटिरहेका
अधबैंसे महिलाहरूको झुण्ड
नांगै–भुतुंगै खेलिरहेका नानीहरू ।
देखे
बुद्धले बाटैभरि ।
पत्नीको दुःख
बिमारी आमा–बाबु
आकाश देखिने घरको धुरी
छोराछोरीको अनिश्चित भविष्य ।
सम्झे बुद्धले ।
साँझ
बसको अन्तिम सिटबाट
ओर्लिए
भञ्ज्याङको चौबाटोमा बुद्ध ।
माओ, माक्र्स र लेनिनका पुस्तकहरू
जीवन, दर्शन र सिद्धान्तका पुस्तकहरू ।
सुरक्षित थिए झोलाभित्र ।
एक छिन उभिए बुद्ध
झोलामा लागेको धुलो टकटक्याए
र हेरे तऽऽऽऽऽऽऽऽल
गाउँको फेदीमा थियो
बुद्धको घर
जो बुद्धलाई हेरिरहेको थियो, एकटकले उकालो ।
चौतारीमा बसे बुद्ध
र मनमनै सोचेर गम खाए ।
म आदर्शवादी
पुरुष हुने भ्रमबाट बच्न चाहन्छु ।
