किभमा रुसको ड्रोन, क्रुज र ब्यालेस्टिक मिसाइल आक्रमण

रुसले किभमा ड्रोन, क्रुज तथा ब्यालेस्टिक मिसाइल आक्रमण गरेको युक्रेनको वायुसेनाले बताएको छ। सोमबार बिहान युक्रेनको राजधानीमा शृंखलाबद्ध धेरै विस्फोट भएका र राजधानीका बासिन्दालाई बम आश्रय स्थलहरूमा पठाएको बताइएको छ।

किभका मेयर भिटाली क्लिट्स्कोले आपतकालीन सेवाहरूलाई किभको होलोसिभस्की जिल्लामा बोलाइएको बताए। उनका अनुसार सेभचेनकिभ्स्की जिल्लामा भग्नावशेषमा खसेर एक व्यक्ति घाइते भएका छन्।

‘हरेक कुराको जवाफ हुनेछ, दुश्मनले यो महसुस गर्नेछ,’ आक्रमणपछि राष्ट्रपति कार्यालयका प्रमुख एन्ड्री यरमकले टेलिग्राम पेजमा पोस्ट गरेका छन्। वायुसेनाका अनुसार रुसले किभलाई लक्षित गर्दै ब्यालेस्टिक मिसाइल प्रक्षेपण र केही ड्रोनका साथ क्रुज मिसाइलहरू प्रहार गरेको थियो।

किभ सहरका सैन्य प्रशासनका प्रमुख सेरही पोपकोले युक्रेनको राजधानी र यसका उपनगरहरूमा प्रहार गरिएका १० भन्दा धेरै क्रुज मिसाइल, करिब १० ब्यालेस्टिक मिसाइल र एउटा ड्रोनलाई युक्रेनको हवाई सुरक्षाले नष्ट गरेको बताए।

युक्रेनी सञ्चारमाध्यमका अनुसार युक्रेनको दोस्रो सबैभन्दा ठुलो सहर खार्किभमा पनि विस्फोट भएका छन्। खार्किभ क्षेत्रका प्रमुख ओलेह सिनिहबोभले खार्किभको इन्ड्रस्ट्रियलनी जिल्लामा बिहानै आक्रमणको पुष्टि गर्दै आक्रमणबाट एउटा आवासीय भवन र अन्य धेरैमा आगो लागेको बताए। 

रुसको सेनाले करिब साढे दुई वर्षदेखि चलिरहेको युद्धको सबैभन्दा ठुलो युक्रेनी आक्रमणमा धेरै रुसी क्षेत्रलाई लक्षित गरी १५८ युक्रेनी ड्रोनहरूलाई रोकेको र नष्ट गरेको रिपोर्ट दिएको एक दिनपछि रुसबाट यो आक्रमण भएको हो।

यो आक्रमण रुसको कुर्स्क क्षेत्रमा युक्रेनी सेनाको घुसपैठको केही सातापछि भएको हो। मस्कोको सेनाले अहिलेसम्म युक्रेनी सेनालाई पछाडि धकेल्नका लागि संघर्ष गरेको छ र क्रेमलिनले यसको जवाफ दिने वाचा गरेको छ।