- वि.सं २o८२ जेठ २९ बिहीबार
ढल निर्माणको ठेक्का लगाउँदा ठेकेदारसँग मिलेमतो गरी भ्रष्टाचार गरेको आरोपमा अख्तियार दुरुपयोग अनुसन्धान आयोगले काठमाडौं महानगरका निवर्तमान प्रमुख प्रशासकीय अधिकृत प्रदीप परियारसहित सातजनाविरुद्ध विशेष अदालतमा मुद्दा दायर गरेको छ । बुधबार दायर मुद्दामा अख्तियारले ठेक्कामा चार करोड ३१ लाख ७२ हजार रुपैयाँ हिनामिना भएको दाबी गरेको छ । परियार हाल सूचना तथा प्रसारण विभागका महानिर्देशक छन् ।
काठमाडौं महानगरपालिकाको सामाखुसी करिडोरअन्तर्गत बसुन्धरादेखि म्हेपीसम्मको ढल निर्माण कार्यको ठेक्कामा भ्रष्टाचार भएको अख्तियारको आरोपपत्रमा उल्लेख छ । ठेक्काको खरिद प्रक्रियाका विभिन्न भूमिकामा संलग्न पदाधिकारीले मिलेमतो गरी भ्रष्टाचार गरेको अख्तियारको दाबी छ । बदनियत राखेर ठेक्का लगाएको र मनसायपूर्वक गलत मूल्यांकन प्रतिवेदन खडा गरी सार्वजनिक सम्पत्तिको हानिनोक्सानी गरेको अभियोग अख्तियारको छ ।
तत्कालीन प्रमुख प्रशासकीय अधिकृत परियारलाई प्रमुख प्रतिवादी बनाएर अख्तियारले मुद्दा दायर गरेको छ । अख्तियारले परियारविरुद्ध चार करोड ३१ लाख ७२ हजार रुपैयाँ बिगो दाबी गरेको छ । यस्तै, सार्वजनिक सम्पत्तिको हिनामिना वा दुरुपयोग गरेको कसुरमा आठदेखि १० वर्षसम्म कैद सजाय दाबी अख्तियारले गरेको छ । महानगरको प्रमुख प्रशासकीय भएकामा थप तीन वर्षसम्म कैद सजायको दाबी पनि अख्तियारले गरेको छ । परियार महानगर मेयर बालेनका विश्वासिला मानिन्थे ।
ठेक्काको बोलपत्र मूल्यांकन समितिमा संलग्न चारजना निर्देशक रविनमान श्रेष्ठ, शिवराज अधिकारी, वसन्त आचार्य र नमराज ढकाललाई पनि अख्तियारले प्रतिवादी बनाएको छ । यस्तै, सहायक निर्देशक उत्तम दाहाल र इन्जिनियर जनार्दन गिरीविरुद्ध पनि मुद्दा दायर भएको छ । उनीहरूविरुद्ध पनि जनही चार करोड ३१ लाख ७२ हजार रुपैयाँ बिगो र आठ देखि १० वर्षसम्म कैद सजाय दाबी गरिएको छ । सहायक निर्देशक दाहालबाहेक अरू कर्मचारीलाई गलत प्रतिवेदन दिएकामा तीन महिनादेखि एक वर्षसम्म कैद र १० देखि ५० हजारसम्म जरिवानाको दाबी पनि अख्तियारले गरेको छ ।
साढे तीन वर्षअघिको मुद्दासँग जोडिएको ढल प्रकरण
यो मुद्दा तीन वर्षअघि अख्तियारले दायर गरेको अर्को मुद्दासँग जोडिएको देखिन्छ । महानगर आफैँले टेकुमा बनाउन लागेको प्रशासकीय भवनको खरिद कार्यमा भ्रष्टाचार भएको भन्दै अख्तियारले ठेक्का प्रक्रियामा संलग्न पाँचजनाविरुद्ध २९ मंसिर ०७८ मा भ्रष्टाचार मुद्दा दायर गरेको थियो ।
ठेक्काको प्राविधिक मूल्यांकन प्रक्रियामा गलत लिखत तयार गरी निर्माण व्यवसायी छनोट गरेको आरोपमा अख्तियारले गलत लिखत तयार गर्ने कर्मचारीहरूविरुद्ध मुद्दा दायर गरेको थियो । त्यसमा महानगरपालिकाका निर्देशक भैरवबहादुर बोगटी, खरिद इकाइ प्रमुख उपनिर्देशक बखतबहादुर साउद, उपनिर्देशकद्वय सुमन अधिकारी र वीरबहादुर खड्का तथा इन्जिनियर उमेशकुमार बुढाथोकीविरुद्ध अख्तियारले मुद्दा दायर गरेको थियो ।
यस मुद्दामा ठेकेदार समानान्तर संलग्न भई महानगरपालिकाका तत्कालीन पदाधिकारीहरूलाई विशेष अदालतबाट कसुर कायम गरी सजाय गराउन भूमिका निर्वाह गरेको अख्तियारको आरोपपत्रमा छ । त्यही ठेक्काको खरिद कार्यसँग सम्बन्धित भुक्तानीको सम्बन्धमा पाटन उच्च अदालत र नेपाल मध्यस्थता परिषद्समेतमा महानगरपालिकालाई पनि विपक्षी बनाई समानान्तरले निवेदन दिएको थियो । समानान्तरका यी गतिविधिप्रति बदनियत राखेर महानगरले कार्य गरेको अख्तियारको दाबी छ । कानुनी विषय टुंगिनसकेको अपव्याख्या गरी मनसायपूर्वक गलत मूल्यांकन प्रतिवेदन खडा गरी समानान्तरलाई ठेक्का प्रक्रियाबाट बाहिर पठाइएको अख्तियारको दाबी छ ।
ढल निर्माणमा बढी कबोल गर्ने ठेकेदारलाई ठेक्का दिएर भ्रष्टाचार
सामाखुसी करिडोरको ठेक्कामा महानगरले २४ करोड १७ लाख ३६ हजार ४४० रुपैयाँ लागत अनुमान तयार गरेको थियो । यसअनुसार खरिद कानुनअनुसार महानगरले ठेक्का प्रक्रियामा दुई ठेकेदार कम्पनी समानान्तर सेवा प्रालि र कल्पवृक्ष–कोहिनुर जेभीको आर्थिक र प्राविधिक प्रस्ताव हेरेको थियो । समानान्तरले सबैभन्दा कम अर्थात् १८ करोड नौ लाख २२ हजार ३२५ रुपैयाँ र कल्पवृक्ष–कोहिनुरले २२ करोड ४० लाख ९४ हजार ६१२ रुपैयाँ कबोल गरेका थिए । कम रकम कबोल गरे पनि प्राविधिक प्रस्तावमा असफल गराई समानान्तरलाई ठेक्का दिइएन ।
बरु, समानान्तरले भन्दा चार करोड ३१ लाख ७२ हजार २८७ रुपैयाँ कबोल गर्ने कल्पवृक्ष–कोहिनुरलाई ठेक्का दिइएको थियो । बदनियत राखी महानगरपालिकाले ठेक्का समानान्तरलाई नदिने गरी अयोग्य बनाउन कार्य गरेको अख्तियारको आरोप छ । यही बदनियतमा अख्तियारले चार करोड ३१ लाख ७२ हजार २८७ रुपैयाँलाई बिगो कायम गरेको हो । ‘प्रतिवादीहरूले आफ्नो पदको दुरुपयोग गरी–गराई काठमाडौं महानगरपालिकाको सम्पत्तिको बदनियतपूर्वक हानि–नोक्सानी गरे–गराएको तथ्य स्थापित भयो,’ अख्तियारको आरोपपत्रमा उल्लेख छ ।
