न्यायाधीश नियुक्तिमा गृहमन्त्री लेखकले भाग खोज्दै हिँडेको रास्वपा नेता मनीष झाको आरोप

राष्ट्रिय स्वतन्त्र पार्टी (रास्वपा)का प्रवक्ता एवं प्रतिनिधिसभा सदस्य मनीष झाले गृहमन्त्री रमेश लेखकले न्यायाधीशमा भाग खोज्दै हिँडेको आरोप लगाएका छन् ।

आज (सोमबार) प्रतिनिधिसभाको बैठकलाई सम्बोधन गर्दै उनले पूर्वप्रधानन्यायाधीश सुशीला कार्कीले गृहमन्त्री लेखकले भाग खोज्दै हिँडेको खुलासा गरेको सुनाए ।

‘पूर्वप्रधानन्यायाधीश सुशीला कार्कीले केही महिनाअगाडि भन्नुभएको थियो–नेपाली कांग्रेसका वर्तमान गृहमन्त्रीज्यूले न्यायाधीश सिफारिसमा मेरो पार्टीको यो–यो नपर्दिए मलाई गाह्रो हुन्छ भनेर भन्न जानुभएको थियो,’ उनले भने ।

नेता झाले यस्ता प्रकारका अभ्यासले न्यायालयप्रतिको विश्वास कमजोर हुँदै गएको बताए । ‘आज न्यायालयहरूले विभिन्न राजनीतिक संरक्षण त दिइराखेको छ । यो अभ्यासले गर्दा न्यायालयप्रतिको विश्वास कमजोर भएको छ । न्यायालयले न्याय देला कि भनेर हामीहरूले विश्वास गर्ने ठाउँ कम हुँदै गएको छ,’ उनले भने ।