अदालतबाट दोषी ठहर भई फरार प्रतिवादी बर्दिया गुलरिया नपा– १२ का इदु शाहीलाई प्रहरीले पक्राउ गरेको छ । जिल्ला प्रहरी कार्यालय बर्दियाबाट खटिएका प्रहरी टोलीले उनलाई मंगलबार गुलरियाबाट पक्राउ गरेको हो ।
उनीविरुद्ध उच्च अदालत पाटनले बैंकिङ कसुर मुद्दामा चार लाख ९० हजार दश रुपैयाँ जरिवाना ठहर गरेको थियो । गत ४ वैशाखमा भएको फैसलालगत्तै उनी फरार थिए ।
खोजीको क्रममा उनी गुलरिया लुकिछिपी बस्ने गरेको खुलेपछि प्रहरी निगरानीमा थियो । यही क्रममा प्रहरीले उनलाई पक्राउ गरेको हो । सजाय भुक्तान गर्न उनलाई प्रहरीले जिल्ला अदालत बर्दिया पेस गरेको थियो । तर, रकम भुक्तान गर्न नसकेपछि उनलाई जिल्ला कारागार बर्दिया चलान गरिएको प्रहरीको भनाइ छ ।