नेपाल लाइफ इन्स्योरेन्स कम्पनी लिमिटेडले इसेवासँगको सहकार्यमा ‘डाइनामिक क्युआर पेमेन्ट सिस्टम’ सञ्चालनमा ल्याएको छ । सेवाको कम्पनीका प्रमुख कार्यकारी अधिकृत प्रवीणरमण पराजुलीले उद्घाटन गरेका हुन् ।
कम्पनीका नेसनल सेल्स हेड उमापति पोखरेलले डाइनामिक क्युआरमार्फत आफ्नो तथा आफ्नो परिवारको प्रिमियम भुक्तानी गरी सेवा सुचारु गरेको जनाइएको छ । यो सेवा सुचारु भएपछि नेपाल लाइफ इन्स्योरेन्स डाइनामिक क्युआर पेमेन्ट सिस्टम सेवा उपलब्ध गराउने नेपालकै पहिलो र एक मात्र जीवन बिमा कम्पनी बनेको दाबी गरेको छ । यो सेवामार्फत नेपाल लाइफका देशभरिका शाखा तथा उपशाखाहरूबाट डाइनामिक क्युआरका माध्यमबाट भुक्तानी गर्न सकिने जनाइएको छ ।
प्रमुख कार्यकारी अधिकृत पराजुलीले आधुनिक प्रविधिको प्रयोगबाट ग्राहकलाई सहज, सरल सेवा उपलब्ध गराउन कम्पनी लागिपरेको र आउने दिनहरूमा पनि डिजिटल रूपान्तरणको अभ्यासलाई जारी राख्ने बताए । डाइनामिक क्युआर पेमेन्ट सिस्टमबाट बढीमा दुई लाख रुपैयाँसम्मको भुक्तानी गर्न सकिने जनाइएको छ । यो सेवामा बिमितले ६० भन्दा बढी बैंक, सहकारी, लघुवित्त तथा मोबाइल वालेट एप्लिकेसनद्वारा सहजै गर्न सकिने कम्पनीले जनाएको छ ।