अमेरिकी सांसदहरु सन् २०१६ को अमेरिकी राष्ट्रपति चुनावमा रुससँगकाे साँठगाँठ बारे अनुसन्धान गर्न गठित छानबिन समितिको गोप्य प्रतिवेदनको पर्खाइमा छन् । प्रतिवेदनले राष्ट्रपति डोनाल्ड ट्रम्पको पद नै धरापमा पार्ने खतरा रहेको अनुमान गरिएकाे छ । 

महान्यायाधीवक्ता विलियम बारले अमेरिकी कंग्रेस र आमजनतालाई प्रतिवेदनको मुख्य अंश उपलब्ध गराउने अपेक्षा गरिएको छ । साे प्रतिवेदन २२ महिना लगाएर विशेष अनुसन्धाता रोबर्ट मुलरले अनुसन्धान गरेका हुन् । उनले शनिबार प्रतिवेदन अध्ययन गर्न नौ घण्टा बिताएका थिए । त्यसबेला उनले प्रतिवेदनको मुख्य सार हप्ता दिनपछि सार्वजनिक गर्ने बताएका थिए । ट्रम्प र उनको भित्री घेरामा रहेर काम गर्नेहरुले प्रतिवेदन हस्तान्तरण गर्नुअघि मुख्य अनुसन्धानकर्ता मुलरले दोषारोपण नगरेकामा खुसी भएका थिए । 

अमेरिकी संविधानमा राष्ट्रपतिमाथिको छानबिन प्रतिवेदन महान्यायाधीवक्ताले अध्ययन गरेपछि मात्र सार्वजनिक गर्ने प्रावधान रहेकाे छ । महान्यायाधीवक्ता बारले प्रतिवेदनलाई जतिसक्दो चाँडो र पारदर्शिताका साथ सार्वजनिक गर्ने बताउँदै आएका छन् ।

मुलर स्वयंले भने प्रतिवेदनका बारेमा केही बताएका छैनन् । अमेरिकी समाजमा मुलरको प्रतिवेदनलाई लिएर विभिन्न अडकलबाजी सुरू हुन थालिएकाे छ । केहीले मुलरको रहस्यमयी प्रतिवेदनले राष्ट्रपति ट्रम्पलाई सफाइ दिएको अनुमान गरेका छन् । तर कतिपयले संघीय जाँच ब्यूरोका तत्कालीन निर्देशक जेम्स कोमेलाई सन् २०१७ मा बर्खास्त गरी राष्ट्रपतिले सबैतिर हस्तक्षेप गरेको र न्यायमा अवरोध गरेको दाबी गरेका छन् । उनीहरुको विश्वास छ, छानबिन कार्य मुलरको प्रतिवेदनमा मात्र सीमित हुने छैन, थप अनुसन्धानको ढोका यस प्रतिवेदनले खोल्नेछ । 

मुलरले यसअघि ट्रम्पको चुनावी अभियानमा संलग्न ३४ जना र तीन वटा कम्पनीमाथि फौजदारी अभियोग दर्ता गरिसकेका छन् । ट्रम्पका पूर्व चुनाव प्रचार प्रमुख पल म्यानाफोर्ट र पूर्व निजी वकील माइकल कोहेनलाई जेल सजाय गरिएको छ । तर ट्रम्पको चुनावी अभियान र मस्कोबीच प्रत्यक्ष सहकार्य भए नभएको प्रश्नका बारेमा हालसम्म कसैलाई दोषी ठहर्याइएको छैन । संघीय जाँच ब्यूरो (एफबीआई)का पूर्व निर्देशक मुलरले अनुसन्धानका सिलसिलामा राष्ट्रपति ट्रम्पसँग अन्तरवार्ता लिएका थिएन । बरु, रुससँगको सम्बन्धका बारेमा ट्रम्पले केही प्रश्नको लिखित जवाफ दिएका थिए । 

जनवरी २०१७ मा राष्ट्रपति ट्रम्पले पद सम्हाले लगत्तै अमेरिकी गुप्तचर निकायहरुले चुनावी अभियानका क्रममा इमेल ह्याकिङको कार्यमा रुसको संलग्नता रहेको निष्कर्ष निकालेका थिए । रुसीहरुले अनलाइन प्रचारबाजी गरी अमेरिकी समाजमा घृणा र द्वन्द्व फैल्याउन भूमिका खेलेको पनि दाबी गरिएको थियो । रुसीहरुको यस्तो कार्यले राष्ट्रपतिमा डेमोक्र्याटिक पार्टीका तर्फबाट उम्मेदवार भएकी हिलारी क्लिन्टनलाई ठूलो क्षति पुगको थियो ।