बाजुराको बडिमालिका नगरपालिका– ९ सेलाघाटका बाढीपीडित ३० परिवारले राहतस्वरूप २५ दिनपछि ३० केजी चामल पाएका छन्। बडिमालिका नगरपालिकाले पीडित परिवारलाई राहतस्वरूप प्रतिपरिवार ३० केजी चामल, दुई केजी दाललगायत अन्य खाद्यसामग्री वितरण गरेको छ ।
यता बाढीपीडित परिवारले बाढीपहिरोबाट घरजग्गा क्षति भएको छ, ३० केजी चामल दुई केजी दालले गुजारा नचल्ने भन्दै गुनासो गरेका छन् ।
नगरप्रमुख अमरबहादुर खड्कालगायतको टोलीले राहत वितरण गरेको हो । बाढीपीडित परिवारको अन्य क्षतिपूर्तिका लागि नगरपालिकाले उपल्लो निकायसँग समन्वय गरी थप राहत उपलब्ध गराउने नगरप्रमुख खड्काले आश्वासन दिएका छन् ।