आइपिएलमा यस पटक हुने छैन सधैं झैं भव्य उद्घाटन कार्यक्रम, किन ?
इन्डियन प्रिमियर लिग आइपिएलको १२ औँ संस्करण शनिबारदेखि सुरु हुँदै छ । उद्घाटन खेलमा गत सिजनको बिजेता चेन्नाई सुपर किंग्ससँग रोयल च्यालेन्जर्स बेंग्लोरले राति ८ः१५ बजे प्रतिस्पर्धा गर्दै छ । तर, विगतका ११ संस्करणमा झैं यस पटककाे खेलमा भव्य उद्घाटन समारोह हुने छैन । सिधै पहिलो खेल सुरु हुनेछ ।
आयोजकले नै यस पटक कुनै उद्घाटन कार्यक्रम नगरिने निर्णय गरेको भारतीय समाचार माध्यमले जनाएकाे छ । समाचारका अनुसार आयोजकले उद्घाटन कार्यक्रममा लाग्ने खर्च कही दिनअघि पुलुवामामा भएको आक्रमणमा मारिएका सैनिक परिवारलाई प्रदान गरिने छ ।
आयोजकले यसका लागि २० करोड भारतीय रुपैयाँ छुट्याएको छ । अन्य कार्यक्रम नभए पनि खेल सुरु हुनुअघि भारतीय सेनाको ब्यान्डले आफ्नो प्रस्तुति देखाउने समाचारमा उल्लेख छ ।