राष्ट्रिय अनुसन्धान विभागमा एआइजीसरहको अतिरिक्त प्रमुख अनुसन्धान निर्देशक पदमा सरकारले एक दरबन्दी थपेर दुईजनाको बढुवा गरेको छ। मन्त्रिपरिषद्को बिहीबारको बैठकले अनुसन्धान निर्देशकद्वय हुतराज थापा र ओम जोशीको बढुवा गरेको हो।
विभागमा गत वैशाखदेखि नै अतिरिक्त प्रमुख अनुसन्धान निर्देशक पद रिक्त थियो। कसलाई बढुवा गर्ने भन्ने विषयमा विवाद हुँदा पद लामो समय रिक्त भएको थियो। सरकारले संगठन तथा व्यवस्थापन सर्वेक्षण गरी एक पद थप गरेको थियो। हाल बढुवा भएका दुईमध्ये एकजना एक महिनापछि विभागको प्रमुख अनुसन्धान निर्देशक बन्नेछन्।