Read Time : > 1 मिनेट
२०७९ श्रावण २३ सोमबार ०६:५८:००
प्रदेश र संघीय निर्वाचनका लागि साउन मसान्तभित्र सिट बाँडफाँडको मोडालिटीसहित सुझाव दिन गठित सत्तारूढ पाँचदलीय कार्यदलको पहिलो बैठक सोमबार बस्दै छ । बैठकमा गठबन्धनको आधार र मापदण्डको विषयमा छलफल हुने कार्यदल सदस्यले बताएका छन् ।
पार्टीका नेताहरूको परामर्शका आधारमा सुरुमा आधार र मापदण्ड तय गरेपछि सिट बाँडफाँडबारे छलफल गर्ने कार्यदलको तयारी छ । दिउँसो ३ बजे प्रधानमन्त्रीनिवास बालुवाटारमा बैठक बस्दै छ । कार्यदल सदस्य सिटौलाका अनुसार तालमेलको आधारबारे पहिलो बैठकमा छलफल हुनेछ । ‘तालमेलको आधार के–कस्तो हुने भन्नेबारे टुंगो लागेको छैन । बैठकमा छलफल सुरु हुन्छ । कार्यदलको बैठकअघि कांग्रेसका शीर्ष नेताहरूको बैठक बस्दै छ,’ सिटौलाले भने ।
दलहरूले आवश्यक गृहकार्य नगरेकाले पहिलो बैठक औपचारिकतामा सीमित हुने कार्यदल सदस्यहरूले बताएका छन् । अनौपचारिक छलफल गरे पनि औपचारिक रूपमा सिट संख्या दाबी गर्ने गरी दलहरूले ठोस छलफल गरिसकेका छैनन् । आधार र माददण्ड तयार भएपछि सिट बाँडफाँडबारे दलहरूको तर्फबाट दाबी पेस हुनेछ । ‘पहिलो बैठकमा सिट बाँडफाँड के–कसरी गर्ने भन्नेबारे छलफल प्रारम्भ हुनेछ । निश्चित मापदण्ड बनाएर जान्छौँ,’ कार्यदल सदस्य हिमलाल पुरीले भने ।
माओवादी, एकीकृत समाजवादी र जसपाले पनि सिट दाबीबारे ठोस छलफल गरेका छैनन् । गुरुङका अनुसार माओवादीमा अनौपचारिक छलफल जारी छ । अध्यक्ष प्रचण्ड जापानबाट फर्केपछि ठोस छलफल हुने उनले बताए । कार्यदलले आधार र मापदण्ड तयार पारेपछि सोही आधारमा पार्टीमा छलफल हुने एकीकृत समाजवादीका उपमहासचिव प्रकाश ज्वालाले जानकारी दिए । पुरीका अनुसार जनमोर्चाले पनि सिट दाबीबारे औपचारिक छलफल गरिसकेको छैन ।
